Blog

काठमाडौँ, २० भदौ। भारतकी ब्याटिङ सुपरस्टार स्मृति मन्धानाले दुबईमा जारी महिला एसिया कपमा ६४ बलमा कीर्तिमानी १२४ रन बनाएर महिला अन्तर्राष्ट्रिय क्रिकेटमा सर्वाधिक रन बनाउने खेलाडी बनेकी छिन्।

 

बिहीबार हङकङविरुद्धको खेलमा जित दिलाउने इनिङ्स खेल्ने क्रममा मन्धानाले भारतकी पूर्वकप्तान मिताली राजलाई पछि पारेकी हुन्; मिताली १०,८६८ अन्तर्राष्ट्रिय रनसहित शीर्ष स्थानमा थिइन्।

 

याे सँगै टी-२० प्रतियोगिताको सेमिफाइनलमा भारतको स्थान पनि पक्का गरेकाे थियाे ।

 

अस्ट्रेलियाकी मेग ल्यानिङ र दक्षिण अफ्रिकाकी लौरा वोल्भार्ड्ट (दुवैको नाममा १७-१७ शतक छन्) लाई पछि पार्दै ३० वर्षीया यी खेलाडी विभिन्न ढाँचाका खेलहरूमा गरी कुल १८ शतकसहित महिला अन्तर्राष्ट्रिय क्रिकेटमा सर्वाधिक शतक प्रहार गर्ने खेलाडीसमेत बनेकी छिन्।

 

सन् २०१३ मा भारतका लागि डेब्यु गरेकी मन्धानाले गत वर्ष आफ्नो पहिलो टी-२० अन्तर्राष्ट्रिय शतक पूरा गरेसँगै क्रिकेटका तीनै ढाँचामा अन्तर्राष्ट्रिय शतक प्रहार गर्ने पहिलो भारतीय महिला बनिन्।

उनको नाममा टेस्ट र टी-२० अन्तर्राष्ट्रियमा दुई-दुई तथा एकदिवसीय अन्तर्राष्ट्रियमा १४ शतक रहेका छन्।

 

भारतीय खेलकुद समाचार माध्यम 'स्पोर्टस्टार' का अनुसार मन्धानाले भनिन्, "ब्याटिङ गरिरहँदा मलाई कुन कीर्तिमान बन्दैछ भन्ने थाहा थिएन, किनकि मलाई ठ्याक्कै कति रन भयो भन्ने जानकारी थिएन।"

 

उनले थपिन्, "म भन्छु, यो भारतीय क्रिकेटका लागि निकै राम्रो दिन हो।"  उनले मिताली राजको प्रशंसा गर्दै उनलाई 'दिग्गज' र 'रोल मोडल' (अनुकरणीय व्यक्तित्व) को संज्ञा दिइन्।

 

मन्धानाको इनिङ्समा १४ चौका र सात छक्का समावेश थिए; भारतले १९३-५ को योगफल खडा गर्‍यो र हङकङलाई ५६ रनमा अलआउट गर्दै १३७ रनको जित हासिल गर्‍यो। 

उनले हङकङको अनुशासित बलिङका कारण सुरुवाती चरणमा खेल्न कठिन भएको बताइन्।  "उनीहरूले पावरप्लेमा अनुशासित भएर उत्कृष्ट बलिङ गरे र उनीहरूले देखाएको ऊर्जाबाट हामी सिक्नेछौँ," मन्धानाले भनिन्; उनले आफ्नो यो सफलता परिवारलाई समर्पित गरिन्।

 

आजको राशिफलः वि.सं. २०८३ भदौ २० गते शनिबार, इ.सं. २०२६ सेप्टेम्बर ०५, ऋतुः वर्षा, अयनः दक्षिणायन, नेपाल संवत् ११४६, भाद्र कृष्ण पक्षको नवमी तिथि, नक्षत्रः मृगशिरा, चन्द्रमा वृष राशिमा, सूर्य सिंह राशिमा, योगः वज्र, करणः तैतिल। आज गोगा नवमी र विभिन्न ठाउँमा राधाकृष्ण रथयात्रा हुनेछ। आज नेपालमा सूर्योदय बिहान ५ः४५ बजे र सूर्यास्त साँझ ६ः१९ बजे हुनेछ।

 

आज शनिदेवका लागि व्रत, दान र ध्यान गर्नाले शुभ फल प्राप्त हुन्छ। शनिचालीसा वा हनुमानचालीसाको पाठ गरेमा तथा शनिका लागि जप र दान गरेमा रोकिएका सम्पूर्ण कार्यहरू बन्नेछन् र न्याय प्राप्त हुनेछ। आज आफ्नो विचार र कर्मलाई शुद्ध गर्दा शुभ हुन्छ।

 

मेष राशि: दिन सामान्य रहनेछ। घरायसी व्यवहार मिलाउनुपर्नेमा समय खर्च हुनेछ। नयाँ लगानी गर्ने राम्रो समय छैन, धन फस्ने सम्भावना छ। आज बिहान गाईलाई पुरी खुवाएर दिनको शुभारम्भ गर्नुहोला।

शुभ रङ: गुलाबी | शुभ अङ्क: ६

 

वृष राशि: कामको अवसर पाइनेछ। आर्थिक उन्नति होला। प्रेममा विवाद उत्पन्न हुनसक्छ। साँझतिर मानसिक तनाव बढ्नेछ र निद्रा बिग्रन सक्छ। आज रातो रुमाल दान गरेर दिनको शुभारम्भ गर्नुहोला।

शुभ रङ: सेतो | शुभ अङ्क: ९

 

मिथुन राशि: केही महत्त्वपूर्ण कार्य गर्नुपरेमा बिहान ११ः३० बजेभित्र गर्नुहोला। बेलुका लामो दूरीको यात्रामा ननिस्कनुहोला। सामान्य झमेला र चोटपटकको योग छ। आज हरियो वस्तुको प्रयोग गर्नुहोला।

शुभ रङ: हल्का रातो | शुभ अङ्क: १६

 

कर्कट राशि: नोकरी र व्यापारमा सफलता प्राप्त हुनेछ। समृद्धि बढ्ने योग छ। मन चञ्चल रहला। आफन्तबाट हेलामा परिने समय छ, ख्याल गर्नुहोला। अष्टगन्धको टीका लगाएर दिनको सुरुवात गर्नुहोला।

शुभ रङ: पहेँलो | शुभ अङ्क: २

 

सिंह राशि: खानपिनमा विशेष ध्यान दिनुहोला। बोलीको प्रभाव पनि कमजोर रहनेछ। आमाबुवाप्रति सम्मान बढ्नेछ। बिहानतिर टाढाको यात्रा नगर्नुहोला। गरिबलाई भोजन र कपडा दान गर्न आज शुभ दिन छ।

शुभ रङ: निलो | शुभ अङ्क: ८

 

कन्या राशि: रुचिअनुसार खानपिन नहुन सक्छ। व्यापार र नोकरीमा सामान्य प्रगति देखिन्छ। मन उदास हुनेछ। आफ्नो इष्टदेवतालाई सम्झेर पहेँलो फूल चढाएर दिनको सुरुवात गर्नुहोला।

शुभ रङ: बैजनी | शुभ अङ्क: १४

 

तुला राशि: अपजस पाउने योग छ, त्यसैले आज संयम रहनुहोला। स्वास्थ्यमा सुधार हुनेछ। शत्रुमाथि विजय प्राप्त हुनेछ। आमाबुवाको सेवा गर्नुहोला र खराब खानपिनबाट जोगिनुहोला।

शुभ रङ: कालो | शुभ अङ्क: ११

 

वृश्चिक राशि: बिहानको समयमा सामान्यतया आलस्य भए पनि दिउँसोदेखि फुर्तिलोपना आउनेछ। धन, विद्या र बुद्धिमा प्रगति देखिन्छ। आफन्तसँगको सम्बन्धमा सुधार हुनेछ। कुकुरलाई खानेकुरा दिनुहोला।

शुभ रङ: सेतो | शुभ अङ्क: २

 

धनु राशि: सन्तानको पिरले सताउनेछ। दिन सामान्य र नियमित कार्यमा बित्नेछ। नयाँ काम गर्ने अवसर छैन। आमाबुवाको सेवा गर्ने अवसर पाइएला। आज पिपलको दर्शन गरेर दिनको सुरुवात गर्नुहोला।

शुभ रङ: पहेँलो | शुभ अङ्क: १२

 

मकर राशि: दाम्पत्य सम्बन्धमा सुधार आउनेछ। मन प्रसन्न रहनेछ। धार्मिक कार्य गर्ने अवसर पाइनेछ। बोलीमा संयम राख्नुहोला, भेटघाटका प्रशस्त अवसर प्राप्त हुनेछन्। निलो वस्तुको प्रयोग गर्नुहोला।

शुभ रङ: हरियो | शुभ अङ्क: ५

 

कुम्भ राशि: दिउँसो स्वास्थ्यमा सामान्य गडबडी आउनेछ। साँझको समयमा मिष्ठान्न भोजनको अवसर प्राप्त हुनेछ। आफन्तसँगको सम्बन्ध सुधार हुनेछ। आज कापी-कलम दान गर्नु शुभ हुनेछ।

शुभ रङ: निलो | शुभ अङ्क: ४

 

मीन राशि: पढाइलेखाइमा मन जानेछ। व्यापारमा प्रगति हुनेछ। सामाजिक कार्यमा मन जानेछ र मन प्रसन्न रहनेछ। आज माता लक्ष्मीको पूजा/सेवा गरेर दिनको सुरुवात गर्नु शुभ हुनेछ।

शुभ रङ: गुलाबी | शुभ अङ्क: ११

 

डा. खेमराज मिश्र, पीएचडी (उहाँ फलित ज्योतिषविद् तथा ज्योतिष अनुसन्धानकर्ता, नेपाल ज्योतिष परिषद्का केन्द्रीय उपमहासचिवकाे जिम्मेवारीमा पनि हुनुहुन्छ)

सुर्खेत, १९ भदौ । कर्णाली प्रदेशकै सबैभन्दा ठूलो अस्पताल कर्णाली प्रदेश अस्पताल भदौ २२ र २३ गते पनि खुल्ने भएको छ।

संघीय सरकारले भदौ २२ गते भोटेकोशी बाढी पीडितको शोक दिवस मनाउने र २३ गते जेनजी आन्दोलनका शहिदको सम्झनामा सार्वजनिक बिदा दिने निर्णय गरेको थियो।

कर्णाली प्रदेश अस्पतालका निर्देशक डा. गणेश थापाले आफूहरूले शनिबार र आइतबार बाहेक अन्य कुनै पनि सार्वजनिक बिदाका दिनमा अस्पतालले सेवा प्रवाह गर्ने बताए।

'ती दुवै दिन हामीले सेवा प्रवाह गर्छौं,' उनले भने, 'सेवाग्राही निर्धक्क भएर सेवा लिन अस्पताल आए हुन्छ।' उनले आज पनि अस्पतालले सेवा प्रवाह गरिरहेको बताए।

अस्पतालले २०८३ बैशाखदेखि नियमित शनिबार र आइतबार बाहेकका सार्वजनिक विदा तथा आकस्मिक बिदामा ओपीडीसहितका सबै विशेषज्ञ सेवा दिइरहेको छ। जसबाट कर्णाली जस्तो जटिल भूगोलबाट आएका बिरामीलाई लामो विदामा पनि धेरै कुर्नु नपर्ने र सेवा प्रवाहमा समेत सहज भएको छ।

पोखरा, १९ भदौ । कास्कीको पोखरा महानगरपालिका–१८ गैरीचौतारास्थित फेवातालमा कार खस्दा दुई जना भारतीय नागरिकको मृत्यु भएको छ भने दुई जनाको सकुशल उद्धार गरिएको छ।

पोखराको लेकसाइडतर्फ आउँदै गरेको बीआर ०५ बीबी ६७५९ नम्बरको भारतीय कार अनियन्त्रित भई फेवातालमा खसेको हो। दुर्घटनाको जानकारी पाउनासाथ सशस्त्र प्रहरी बल नेपाल नं. २४ कालिका गण कास्कीबाट सशस्त्र प्रहरी निरीक्षक शरण खड्काको कमाण्डमा गोताखोरसहितको टोली उद्धारका लागि खटिएको थियो।

कारमा सवार भारत घर भएका २७ वर्षीय अनमोल कुमार यादव र ३३ वर्षीय सुरज यादवलाई नेपाल प्रहरी र स्थानीयवासीले सकुशल उद्धार गरी उपचारका लागि पोखरास्थित जिओमाक्स (जिएमसी) अस्पताल पुर्‍याएका छन्। उनीहरूको अवस्था मध्यम रहेको छ।

त्यस्तै, कारमा सवार अन्य दुई जना २६ वर्षीय नवदीप कुमार यादव र २६ वर्षीय प्रियान्सु पाण्डेलाई सशस्त्र प्रहरीको गोताखोर टोलीले तालबाट अचेत अवस्थामा बाहिर निकालेको थियो। उपचारका लागि पोखरा स्वास्थ्य विज्ञान प्रतिष्ठान लगिएका उनीहरूलाई चिकित्सकले बिहान ६:२० बजे मृत घोषणा गरेका हुन्।

दुर्घटनाग्रस्त कारलाई पनि क्रेनको प्रयोग गरी तालबाट बाहिर निकालिएको छ।

धनगढी, १९ भदौ । देशका विभिन्न क्षेत्रमा आएको बाढी, पहिरो तथा प्राकृतिक विपत्तिका कारण प्रभावित नागरिकको अवस्था पीडादायी बन्दै गएको भन्दै समाजसेवी तथा निर्वर्तमान मेयर नृप वडले पीडितको राहत, उद्धार र पुनःस्थापनालाई प्रभावकारी बनाउन सरकारसँग आग्रह गरेका छन्।

विपत्तिको समयमा नागरिकको पीडा कुनै दल, जात, क्षेत्र, वर्ग वा राजनीतिक आस्थासँग जोडेर हेर्न नहुने उल्लेख गर्दै वडले राहत वितरण गर्दा सबै पीडित नागरिकलाई समान व्यवहार र सम्मानजनक ढंगले राहत उपलब्ध गराउनुपर्ने बताएका छन्।

उनले सरकार तथा सम्बन्धित निकायलाई राहत वितरणमा कुनै पनि प्रकारको पक्षपात नगर्न विशेष आग्रह गरेका छन्। वास्तविक पीडितको पहिचान गरी आवश्यकता र क्षतिको अवस्थाका आधारमा राहत उपलब्ध गराउनुपर्ने उनको भनाइ छ।
“विपत्तिको समयमा पीडित नागरिकको सबैभन्दा ठूलो आवश्यकता सहयोग र भरोसा हो। यस्तो अवस्थामा कसैलाई राजनीतिक आस्था, व्यक्तिगत सम्बन्ध वा अन्य कुनै आधारमा विभेद गर्नु हुँदैन। राहत पाउने प्रत्येक नागरिकले सम्मानपूर्वक राज्यको सहयोग पाउने वातावरण बनाउनुपर्छ,” वडको आग्रह छ।

उनका अनुसार राहत वितरण केवल सामग्री बाँड्ने कार्यमा सीमित हुनु हुँदैन। प्रभावित परिवारलाई तत्काल आवश्यक खाद्यान्न, कपडा, सुरक्षित बसोबास, खानेपानी, स्वास्थ्य सेवा तथा अन्य अत्यावश्यक सामग्री उपलब्ध गराउनुका साथै दीर्घकालीन रूपमा पुनःस्थापनाको योजना पनि अघि बढाउन आवश्यक छ।

बाढी तथा पहिरोबाट घरबार गुमाएका, रोजगारी तथा आयआर्जनको स्रोत गुमाएका र विस्थापित भएका परिवारको अवस्थालाई विशेष प्राथमिकतामा राख्नुपर्ने उनले बताए। स्थानीय तह, प्रदेश सरकार र संघीय सरकारबीच प्रभावकारी समन्वय गरी राहत तथा पुनःस्थापनाका कार्यक्रम सञ्चालन गर्नुपर्ने उनको सुझाव छ।

वडले विपत्तिको समयमा राजनीतिक प्रतिस्पर्धा र आरोप–प्रत्यारोपभन्दा माथि उठेर मानवीय सेवामा सबै पक्ष एकजुट हुनुपर्ने धारणा व्यक्त गरेका छन्। पीडित नागरिकको दुःखलाई राजनीतिक लाभका लागि प्रयोग नगरी वास्तविक आवश्यकता पहिचान गरेर सहयोग गर्नुपर्नेमा उनले जोड दिएका छन्।

उनले देशभरका सामाजिक संघसंस्था, नागरिक समाज, व्यवसायी, युवा तथा विभिन्न समुदायलाई पनि आफ्नो क्षमताअनुसार बाढीपीडितको सहयोगमा जुट्न आह्वान गरेका छन्। साथै राहत संकलन र वितरणमा पारदर्शिता कायम गर्दै सहयोग कहाँ र कसरी प्रयोग भइरहेको छ भन्ने जानकारी सार्वजनिक गर्न सम्बन्धित निकायलाई आग्रह गरेका छन्।

नृप वडको मुख्य आग्रह भनेको विपत्तिमा परेका प्रत्येक नागरिकलाई राज्यले आफ्नै नागरिकका रूपमा हेरेर भेदभावरहित, पारदर्शी र सम्मानजनक राहत उपलब्ध गराउनु हो। कठिन परिस्थितिमा पीडितको आँसु पुछ्नु नै राज्य र समाजको पहिलो जिम्मेवारी भएको उनको भनाइ छ।

“आज विपत्तिमा परेको नागरिकको साथमा राज्य उभिन सके मात्र नागरिकले राज्यप्रति भरोसा गर्न सक्छन्। त्यसैले राहत वितरणमा कुनै पक्षपात होइन, मानवीयता, आवश्यकता र न्यायलाई आधार बनाऔँ,” वडले सरकारसँग अनुरोध गरेका छन्।

काठमाडौं, १९ भदौ । नेपाली बजारमा शुक्रबार सुन र चाँदी दुवैको मूल्यमा वृद्धि भएको छ। नेपाल सुनचाँदी व्यवसायी महासंघका अनुसार सुनको मूल्य प्रतितोला २ हजार ५ सय रुपैयाँले बढेर ३ लाख ७ हजार ४ सय रुपैयाँमा कारोबार भइरहेको छ।

यसअघि बिहीबार सुन प्रतितोला ३ लाख ४ हजार ९ सय रुपैयाँमा कारोबार भएको थियो। 

त्यसैगरी, चाँदीको मूल्यमा पनि वृद्धि भएको छ। महासंघका अनुसार चाँदी प्रतितोला ६५ रुपैयाँले बढेर ४ हजार ७ सय ८५ रुपैयाँ पुगेको छ। अघिल्लो दिन बिहीबार चाँदी प्रतितोला ४ हजार ७ सय २५ रुपैयाँमा कारोबार भएको थियो।

सुर्खेत, १९ भदौ ।

कर्णाली प्रदेश सरकारको एक करोड २४ लाखको लगानीमा बनेको कोशेल गृह आजबाट सञ्चालनमा आएको छ । वीरेन्द्रनगरको वडा नम्बर ६ हटियालाईनमा निर्मित उक्त गृहको उद्योग, पर्यटन, वन तथा वातावरण मन्त्री कल्याणी खड्काले उद्घाटन गरेकी हुन् ।

उद्योग तथा उपभोक्ता हित संरक्षण कार्यालय सुर्खेतका कार्यालय प्रमूख मुकुन्दनाथ योगीका अनुसार भवन निर्माण भने २०७९ साल कात्तिकमा नै सम्पन्न भएको थियो तर गृहको सञ्चालनका बारेमा नीति बनाउन, त्यसलाई सञ्चालन गर्न आवश्यक कार्य गर्नुपर्ने भएका कारण ढिलाई भएको हो ।

उक्त गृहबाट हाल नौ जनाले प्रत्यक्ष रोजगारी पाएका छन भने ६ लाख २५ हजार वार्षिक रुपमा सरकारले भाडा पाउने भएका छन् । यसका अलावा अबको केहि दिनमा नै दोश्रो तलामा व्यवसाय सुरु हुने उनको भनाई छ ।

‘उक्त गृहमा अहिले पाँच प्रकारका व्यवसाय सञ्चालनमा रहेका छन् । यहाँ कर्णालीका कच्चा पर्दाथबाट निर्मित काष्ठकलाका सामाग्रीहरु, जडिवुटी, स्थानीय कपडा, खाद्यान्नका उद्योग सञ्चालनमा छन्,’ योगीले भने, ‘औधोगिक पर्यटन, कर्णालीको पहिचान देश विदेशमा बढाउन, श्रम प्रविधिको प्रयोग गरी रोजगारी सिर्जना गर्न यो गृहले महत्वपूर्ण योगदान दिने अपेक्षा कार्यालयले लिएको छ ।’

मन्त्री खड्काले कर्णाल प्राकृतिक स्रोत र सम्पदाको धनी भएको बताउँदै कर्णालीका अर्गानिक उत्पादनको बजारीकरण गरे यहाँको विकास हुने बताइन् ।

‘यस्ता खालका गृह सञ्चालनमा युवाले रोजगारी त पाउँछन नै, कर्णालीमा खेर गईरहेका प्राकृतिक स्रोत साधनको प्रयोगले कर्णाली प्रदेशका नागरिकलाई आर्थिक समृद्धितर्फ लैजाने अपेक्षा सरकारको छ,’ मन्त्री खड्का भन्छिन्, ‘आगामी दिनमा सरकारले यस्ता क्षेत्रमा सकेसम्म बढी भन्दा बढी लगानी गर्ने नीति अख्तियार गर्नेछ ।’