सुभाष कायस्थ
जनकपुरधाम, १६ भदौ । रसुवा जिल्लामा आएको बाढीमा परेका पिडीतहरुको उद्धार, राहत तथा पुनस्थपनाका लागि भनी ठाउँ ठाउँमा विभिन्न संघ संस्थाहरुद्वारा भइरहेको राहत संकलन कार्यमा सिरहा प्रशासनले रोक लगाएको छ ।
बाढीबाट प्रभावित तथा पीडित नागरिकका लागि भन्दै व्यक्तिगत, संघ–संस्था वा समूहले स्वेच्छिक रूपमा राहत सामग्री संकलन नगर्न जिल्ला प्रशासन कार्यालय सिरहाले एक सूचना जारी रोक लगाएको हो । राहतको संकलनको नाममा दुरुपयोग हुन सक्ने भएकाले यसलाई नियन्त्रण गर्ने उद्देश्यले रोक लगाइएको जिल्ला प्रशासन कार्यालय सिरहाले जनाएको छ ।
जिल्ला प्रशासन कार्यालय सिरहाले सूचना जारी गर्दै यही भदौ १० गते रसुवा जिल्लास्थित भेटेकोसी नदीमा आएको बाढीबाट प्रभावित नागरिकका लागि जिल्लाका विभिन्न स्थानबाट राहत सामग्री संकलन भइरहेको जानकारी प्राप्त भएको जनाएको छ ।
प्रशासनले बाढीपीडितका नाममा राहत सामग्री संकलन गर्ने कार्य नगर्न सम्बन्धित सबैलाई अनुरोध गरेको छ । साथै बाढीपीडितका लागि आवश्यक राहत सामग्री उपलब्ध गराउन इच्छुक व्यक्ति, संघ–संस्था वा समूहले आफूसँग उपलब्ध गराउन सक्ने राहत सामग्रीको विवरण नजिकको इलाका प्रशासन कार्यालय वा जिल्ला प्रशासन कार्यालय सिरहामा मार्फत वा जानकारी गराई गर्न आग्रह गरिएको छ ।
प्रशासनका अनुसार राहत वितरणलाई व्यवस्थित तथा प्रभावकारी बनाउन आवश्यक समन्वयमार्फत सामग्री उपलब्ध गराउने व्यवस्था मिलाइनेछ ।
सहायक प्रमुख जिल्ला अधिकारी चेतराज बरालद्वारा जारी सूचनामा बाढीपीडितका लागि सहयोग गर्न चाहने व्यक्ति तथा संस्थाले प्रशासनसँग समन्वय गरेर मात्रै राहत सामग्री उपलब्ध गराउनुपर्ने उल्लेख छ ।
प्रशासनको सूचनाले बाढीपीडितको नाममा अनधिकृत रूपमा राहत संकलन हुने सम्भावना रोक्नुका साथै वास्तविक पीडितसम्म राहत सामग्री प्रभावकारी रूपमा पु¥याउने उद्देश्य राखेको देखिन्छ ।
