काठमाडौं, १६ भदौ । बाढी र पहिरोका कारण बागमती प्रदेशका ललितपुर, धादिङ, रसुवा, नुवाकोट र काभ्रे गरी पाँच जिल्लाका मुख्य राजमार्गहरू अवरुद्ध भएका छन्।
नेपाल प्रहरीले आज बिहान सार्वजनिक गरेको अद्यावधिक विवरणअनुसार पहिरो र बाढीका कारण ती जिल्लाका विभिन्न सडक खण्डमा यातायात सेवा पूर्ण तथा आंशिक रूपमा ठप्प भएको छ।
ललितपुरको बागमती गाउँपालिकास्थित भट्टेडाँडामा पहिरो खसेका कारण कान्ति लोकपथ पूर्ण रूपमा अवरुद्ध भएको छ भने देशकै मुख्य ‘लाइफलाइन’ मानिने पृथ्वी राजमार्गअन्तर्गत धादिङको कृष्णभीर र परेवा भीरमा गएको पहिरोले सडक बन्द गराएको छ।
यस्तै, रसुवा जिल्लामा बाढीका कारण पासाङ ल्हामु सडक खण्डको बेत्रावती–सिमटार तथा त्रिशुली–मैलुङ–स्याफ्रुबेशी खण्डको खाल्टेमा अर्को सूचना जारी नभएसम्मका लागि सवारी साधन सञ्चालनमा रोक लगाइएको छ।
जोखिम व्यवस्थापनका लागि काभ्रे र नुवाकोटमा भने रातको समयमा सवारी सञ्चालनमा निषेध गरिएको छ। काभ्रेस्थित राजमार्गमा साँझ ६ बजेदेखि बिहान ४ बजेसम्म र नुवाकोटको टोखा–छहरे सडक खण्डमा राति १० बजेदेखि बिहान ५ बजेसम्म सवारी साधन चलाउन रोक लगाइएको प्रहरीले जनाएको छ।
