काठमाडौं । पाकिस्तानको गुजरात मूलका दुई दाजुभाइ अब्दुल गफुर (बडेभाइ) र मोहम्मद शकुर (छोटे भाइ) पछिल्लो समय नेपालमा पनि चर्चाको केन्द्र बनेका छन् । उस्तै अनुहारका कारण धेरैले उनीहरूलाई जुम्ल्याहा ठान्ने गरे पनि उनीहरूबीच ८ वर्षको उमेर अन्तर छ ।
अब्दुल गफुरको जन्म १० अक्टोबर १९९४ मा भएको हो भने मोहम्मद शकुरको जन्म २० फेब्रुअरी २००२ मा भएको बताइन्छ । हाल उनीहरू संयुक्त अरब इमिरेट्स (यूएई) को दुबईमा बसेर व्यवसायसँगै सामाजिक सञ्जालमा सक्रिय छन् ।
सानो इलेक्ट्रोनिक्स पसलदेखि करोडौँको साम्राज्यसम्म
जम–जम दाजुभाइ चार दाजुभाइमध्ये क्रमशः जेठा र कान्छा हुन् । सन् २०१३ मा चारै दाजुभाइ मिलेर दुबईमा जम–जम इलेक्ट्रोनिक्स व्यवसाय सुरु गरेका थिए ।
सानो पसलबाट सुरु भएको व्यवसाय अहिले मोबाइल, ल्यापटप, ग्याजेट तथा विभिन्न इलेक्ट्रोनिक्स सामग्रीको ठूलो चेनका रूपमा विस्तार भएको छ । व्यवसाय विस्तारसँगै उनीहरूले रियल स्टेट तथा जम–जम पर्फ्युम्स लगायतका ब्रान्डसमेत सञ्चालन गर्दै आएका छन् ।
सामाजिक सञ्जालले बनायो विश्वभर परिचित
जम–जम दाजुभाइको लोकप्रियताको मुख्य आधार भनेको सोसल मिडिया हो । युट्युब, इन्स्टाग्राम र टिकटकमा उनीहरूको ठूलो फ्यान फलोइङ छ ।
उनीहरूको युट्युब च्यानलमा ८ करोडभन्दा बढी सब्सक्राइबर रहेको दाबी गरिन्छ, जसले उनीहरूलाई एसियाकै चर्चित डिजिटल क्रिएटरमध्ये एक बनाएको छ ।
उनीहरूले दैनिक ठूलो संख्यामा YouTube Shorts तथा Instagram Reels सार्वजनिक गर्छन् । उनीहरूका भिडियोमा इलेक्ट्रोनिक्स पसलका गतिविधि, ग्राहकलाई सर्प्राइज, कमेडी, गिभअवे तथा दाजुभाइबीचको रमाइलो सम्बन्धलाई मुख्य विषय बनाइएको हुन्छ ।
साधारण शैली, हास्यपूर्ण प्रस्तुति र दाजुभाइबीचको आत्मीय सम्बन्ध नै उनीहरूको सामग्रीको मुख्य आकर्षण बनेको छ । यही कारण भारत, पाकिस्तान, नेपाललगायत दक्षिण एसियाली मुलुकमा उनीहरूका भिडियो निकै भाइरल हुने गरेका छन् ।
करोडौँ फलोअर, विश्वव्यापी ब्रान्ड
इन्स्टाग्रामसहित विभिन्न सामाजिक सञ्जालमा उनीहरूको संयुक्त फलोइङ करोडौँमा पुगेको छ । व्यवसाय र सामाजिक सञ्जाललाई एकसाथ अघि बढाउँदै उनीहरूले आफ्नो व्यक्तिगत लोकप्रियतालाई ब्रान्ड विस्तारमा समेत प्रयोग गरेका छन् ।
सामान्य इलेक्ट्रोनिक्स पसलबाट सुरु भएको यात्रा सामाजिक सञ्जालको प्रभावमार्फत विश्वव्यापी पहिचान र सफल व्यवसायमा परिणत हुनु उनीहरूको कथाको सबैभन्दा रोचक पक्ष हो ।
नेपालमा किन भयो यत्रो क्रेज ?
जम–जम दाजुभाइ शुक्रबार काठमाडौं आइपुग्दा त्रिभुवन अन्तर्राष्ट्रिय विमानस्थलमै भव्य स्वागत गरिएको थियो । नेपाली फ्यानहरूले उनीहरूलाई ढाकाटोपी लगाएर स्वागत गरेका थिए ।
शनिबार काठमाडौंको सुन्धारास्थित सिभिल मलमा उनीहरूको पर्फ्युम ब्रान्ड जम–जम पर्फ्युम्सको नेपालमा पहिलो आधिकारिक आउटलेटको ग्राण्ड लन्च गरिएको थियो ।
कार्यक्रममा उनीहरूलाई प्रत्यक्ष भेट्न तथा हेर्न ठूलो संख्यामा प्रशंसकहरू सिभिल मल पुगेका थिए । उनीहरूलाई एक झलक हेर्न र तस्बिर खिचाउनसमेत युवापुस्तामा निकै उत्साह देखिएको थियो ।
नेपाल भ्रमणको मुख्य उद्देश्य जम–जम पर्फ्युम्सको नेपाली बजारमा औपचारिक प्रवेश गराउनु रहेको बताइएको छ । यो उनीहरूको अन्तर्राष्ट्रिय विस्तारको अर्को महत्वपूर्ण चरणका रूपमा हेरिएको छ ।
उद्घाटनपछि जम–जम दाजुभाइले नेपाली फ्यानबाट आफूहरूले अपेक्षा गरेभन्दा धेरै माया पाएको भन्दै खुसी व्यक्त गरेका थिए ।
“हामीले सोचेभन्दा धेरै माया नेपाली फ्यानबाट पायौँ । धन्यवाद ! हामी फेरि आउनेछौँ,” उनीहरूले भनेका थिए ।
सामाजिक सञ्जालबाट बनेको लोकप्रियता, पारिवारिक एकता र व्यवसायलाई एउटै यात्रामा जोड्न सफल जम–जम दाजुभाइको नेपाल भ्रमणले उनीहरूको दक्षिण एसियामा बढ्दो प्रभाव र लोकप्रियतालाई थप प्रस्ट पारेको छ ।
