काठमाडौं, ९ असोज । भारतसँग पराजित भए पनि नेपाली महिला टोलीले कास्य पदक जितेको छ । शुक्रबार टोकाइ सिटिजन जिम्नेसियममा भएको
एसियाली खेलकुदअन्तर्गत कबड्डीको सेमिफाइनलमा नेपाली महिला टोली भारतसँग ४८–२४ ले पराजित भएको छ ।
नेपाल पहिलो हाफमा १७–३१ र दोस्रो हाफमा ७–१७ ले पछि पर्यो । सेमिफाइनलमा रोकिए पनि नेपाली टोली कांस्यपदक भने प्राप्त गरेको छ । कबड्डीमा सेमिफाइनलमा हार्ने टोलीलाई पनि कांस्यपदक दिइन्छ ।
नेपाली महिला कबड्डी टोलीले लगातार दोस्रो कांस्यपदक जितेको हो । यसअघि टोलीले १९औँ एसियाली खेलकुदमा पनि कांस्यपदक जितेको थियो ।
जारी एसियाली खेलकुदमा नेपालले जितेको यो दोस्रो कांस्यपदक हो । यसअघि करातेबाट तेन्जिङ शेर्पाले नेपाललाई कांस्यपदक दिलाएका थिए ।
