बाराको विश्रामपुर गाउँपालिका–१ कल्याणपुरस्थित सीमा क्षेत्रबाट सशस्त्र प्रहरीले भन्सार छली नेपाल भित्र्याउन लागिएका विभिन्न सामान तथा चारवटा सवारीसाधन बरामद गरेको छ।
सशस्त्र प्रहरी बल नेपाल बीओपी बरैनियाबाट खटिएको टोलीले आइतबार भारतबाट नेपालतर्फ ल्याउँदै गरेको अवस्थामा कुरकुरे, सुर्ती, जुत्ता तथा लत्ताकपडालगायतका सामान नियन्त्रणमा लिएको हो।
सशस्त्र प्रहरी बल नेपाल नम्बर १२ गण हेडक्वाटर बाराका प्रवक्ता डिएसपी विक्रम मणि अधिकारीका अनुसार बरामद सामानसँगै २ वटा साइकल, १ मोटरसाइकल र १ स्कुटर समेत नियन्त्रणमा लिइएको छ।
बरामद सामान तथा सवारीसाधनको कुल अन्दाजी मूल्य ७ लाख ९५ हजार ५ सय रुपैयाँ रहेको अधिकारीले बताएका छन्।
उनका अनुसार नियन्त्रणमा लिइएका सामान तथा सवारीसाधन आवश्यक कारबाहीका लागि वीरगञ्ज भन्सार कार्यालय, पर्सा पठाईएको छ। पछिल्लो समय तस्करी नियन्त्रणमा सशस्त्र प्रहरीले सक्रियता देखाएको छ।
