मलेसियामा नेपाली सुरक्षागार्डको मानवीय एकता: बाढीपीडितका लागि ४ लाख ५ हजारभन्दा बढी सहयोग।
क्वालालम्पुर (मलेसिया): नेपालमा आएको विनाशकारी बाढी तथा प्राकृतिक विपत्तिबाट प्रभावित नागरिकहरूको उद्धार तथा राहतका लागि मलेसियामा कार्यरत नेपालीहरूले रु. ४ लाख ५ हजार १६१ भन्दा बढी आर्थिक सहयोग संकलन गरी प्रधानमन्त्री दैवी प्रकोप उद्धार कोषमा सहयोग गरेका छन्।
मलेसियाको Special Squad Security Team मा कार्यरत नेपाली दाजुभाइहरूले मानवीय भावना र मातृभूमिप्रतिको जिम्मेवारीका साथ उक्त सहयोग रकम चन्दको सक्रियतामा संकलन गरेका हुन्। संकलित रकम रु. ४ लाख ५ हजार १६१ रुपैयाँ नेपाल सरकारको प्रधानमन्त्री दैवी प्रकोप उद्धार कोषमा जम्मा गरिएको चन्दा संकलन अभियानका नेतृत्वकर्ता कमल चन्दले जनाइएको छ।
चन्द Special Squad Security Team का म्यानेजर समेत हुन्। साथै उनी प्रवास नेपाली सम्पर्क विभाग, मलेसियाका केन्द्रीय सदस्य पनि हुन्। विपत्तिको समयमा राजनीतिक तथा व्यक्तिगत सीमाभन्दा माथि उठेर मानवीय सहयोगलाई प्राथमिकता दिँदै पीडित नेपालीको राहतका लागि रकम सरकारी कोषमा जम्मा गरिएको बताइएको छ।
यस मानवीय अभियानमा साथ तथा सहयोग गर्नुहुने Special Squad Security Team का सम्पूर्ण नेपाली सुरक्षागार्ड दाजुभाइहरू तथा Boss Dato Nixon प्रति अभियानकर्ता चन्दले हार्दिक आभार व्यक्त गरेका छन्। विदेशमा रहेर पनि मातृभूमिमा परेको विपत्तिमा नेपालीहरूले देखाएको एकता, सद्भाव र मानवीय भावना प्रशंसनीय रहेको बताइएको छ।
अभियानमा सहयोग गर्ने व्यक्तिहरूको विवरणसमेत सार्वजनिक गरिएको छ। सहयोगीहरूको नाम तथा विवरण उपलब्ध गराइएको लिंकमार्फत क्लिक गरि हेर्न सकिने जनाइएको छ।
