तीन वर्षे कार्यकाल पूरा गरी निर्मला केसी आचार्य स्वदेश फिर्ता, कमल कोइरालाको नेपाली राजदूतावास क्वालालम्पुरमा स्वागत।
क्वालालम्पुर। नेपाली राजदूतावास, क्वालालम्पुरमा तृतीय सचिव (लेखा) का रूपमा करिब तीन वर्षे कार्यकाल सफलतापूर्वक सम्पन्न गरी नेपाल फर्कनुभएकी श्रीमती निर्मला के.सी. आचार्यलाई राजदूतावासले भावपूर्ण विदाइ गर्दै आगामी निजामती सेवाको यात्राका लागि हार्दिक शुभकामना व्यक्त गरेको छ। 
राजदूतावासले जारी गरेको शुभकामना सन्देशअनुसार आचार्यले आफ्नो कार्यकालमा आर्थिक प्रशासन, लेखा व्यवस्थापन तथा कार्यालय सञ्चालनलाई थप व्यवस्थित, पारदर्शी र प्रभावकारी बनाउन उल्लेखनीय योगदान पुर्याएकी थिइन्। विदेशस्थित नेपाली नियोगमा रहँदा उनले कूटनीतिक जिम्मेवारीसँगै आर्थिक अनुशासन कायम राख्न खेलेको भूमिकाको समेत उच्च प्रशंसा गरिएको छ।
राजदूतावासले उहाँको समर्पित सेवा, व्यावसायिक दक्षता तथा जिम्मेवारीपूर्ण कार्यशैलीको कदर गर्दै नेपाल फर्किएपछि पनि निजामती सेवामा थप सफल र उपलब्धिमूलक यात्रा तय गर्ने विश्वास व्यक्त गरेको छ।
यसैबीच, आचार्यको स्थानमा सरुवा भई नेपाली राजदूतावास, क्वालालम्पुरमा तृतीय सचिव (लेखा) का रूपमा आउनुभएका श्री कमल कोइरालालाई राजदूतावासले हार्दिक स्वागत गरेको छ।
राजदूतावासले कोइरालाको कार्यकाल सफल, प्रभावकारी र उपलब्धिमूलक हुने विश्वास व्यक्त गर्दै मलेसियामा रहेका नेपाली समुदायलाई गुणस्तरीय र प्रभावकारी सेवा प्रवाह गर्न उहाँको भूमिका महत्वपूर्ण रहने अपेक्षा गरेको छ।
मलेसियामा रहेका नेपाली नागरिकलाई दूतावासीय सेवा सहज, छरितो र पारदर्शी रूपमा उपलब्ध गराउने तथा नेपाल–मलेसिया सम्बन्धलाई अझ सुदृढ बनाउन राजदूतावास निरन्तर प्रतिबद्ध रहेको उल्लेख गर्दै नयाँ जिम्मेवारी सम्हाल्नुभएका अधिकारीलाई पूर्ण सफलताको शुभकामना व्यक्त गरिएको छ।
नेपाली राजदूतावास, क्वालालम्पुरले विदेशमा रहेका नेपाली नागरिकको हित संरक्षण, सेवा प्रवाह र द्विपक्षीय सम्बन्ध प्रवर्द्धनका लागि विभिन्न प्रशासनिक तथा कूटनीतिक गतिविधिलाई निरन्तरता दिँदै आएको छ।
