सप्तरीमा प्रहरीले चलायो गोली, एक जनाको मृत्यु

राजविराज,
सप्तरीको राजगढ गाउँपालिका–२ स्थित भारत-नेपाल सीमावर्ती कमलपुरमा गएराति प्रहरीले चलाएको गोली लागेर एक जनाको ज्यान गएको छ।

जिल्ला प्रहरी कार्यालय सप्तरीका प्रवक्ता डीएसपी जितेन्द्रकुमार बस्नेतका अनुसार, तस्कर समूहले प्रहरीमाथि आक्रमण गरेपछि आत्मरक्षाका लागि गोली चलाउनुपरेको हो।

गोली लागी ३५ वर्षीय लालु यादवको मृत्यु भएको पुष्टि गरिएको छ। उनी सोही वडाका स्थानीय हुन्।
डीएसपी बस्नेतले बताएअनुसार, प्रहरीको गोली यादवको तिघ्रामा लागेको थियो। गम्भीर घाइते भएका उनलाई उपचारका लागि गजेन्द्रनारायण सिंह अस्पताल लैजाँदै गर्दा मृत्यु भएको हो।

के भयो घटनास्थलमा?

प्रहरीका अनुसार, अवैध रूपमा ठूलो परिमाणमा मदिरा लुकाइएको सूचना पाएपछि ९–१० जनाको टोली घटनास्थल पुगेको थियो।
तर प्रहरी पुग्नासाथ करिब १०० जना स्थानीय मानिसहरूले ढुंगा, लाठी र घरेलु हतियारसहित आक्रमण सुरु गरे।

‘३–४ राउन्ड हवाइ फायर गर्दा पनि भिड हटेन, उल्टै आक्रमण गर्न थाले,’ डीएसपी बस्नेतले भने, ‘त्यसपछि आत्मरक्षाका लागि गोली चलाइएको हो।’

गोली चलेपछि भिड तितरबितर भएको र घटनास्थलबाट ठूलो मात्रामा मदिरा बरामद गरिएको प्रहरीले जनाएको छ।

अहिले अवस्था कस्तो छ?

प्रहरी स्रोतका अनुसार घटनाको अनुसन्धान भइरहेको छ भने स्थानीय स्तरमा स्थिति अहिले शान्त छ।
तर एक जनाको मृत्युपछि स्थानीयस्तरमा तनावको सम्भावना रहेकाले थप सुरक्षा सतर्कता अपनाइएको छ।