भारत–नेपाल सीमा हुँदै अफिमजस्तो पदार्थ तस्करी गर्ने तीन जना पक्राउ, २ किलोभन्दा बढी पदार्थ बरामद
बारा/पूर्वी चम्पारण, ८ नोभेम्बर। भारत–नेपाल सीमा हुँदै लागुऔषध तस्करी भइरहेको सूचनाका आधारमा भारतीय सशस्त्र सीमा बल (एसएसबी) र बिहार प्रहरीले संयुक्त गस्तीका क्रममा अफिमजस्तो देखिने २ किलोभन्दा बढी पदार्थसहित तीन जनालाई पक्राउ गरेको छ।
२०२६ नोभेम्बर ८ गते बिहान ११ः४३ बजे प्राप्त विशेष सूचनाका आधारमा एसएसबीको ७१औँ बटालियनअन्तर्गत बीओपी चन्दारमान तथा बिहार प्रहरीको छौडादानो थाना टोलीले संयुक्त विशेष गस्ती सञ्चालन गरेको थियो।
गस्तीका क्रममा भारतको बिहार राज्यस्थित छौडादानो थाना क्षेत्रको धरहरी गाउँनजिकबाट २ किलो ५० ग्राम अफिमजस्तो देखिने पदार्थ प्लास्टिकको बोरामा राखिएको अवस्थामा बरामद गरिएको हो। घटनास्थल भारत–नेपाल सीमा स्तम्भ नम्बर ३७६ बाट करिब २.५ किलोमिटर भारतीय भूमिभित्र रहेको जनाइएको छ।
प्रहरीले घटनामा संलग्न रहेको आरोपमा तीन जनालाई पक्राउ गरेको छ। पक्राउ पर्नेमा भारतको पूर्वी चम्पारण जिल्ला, छौडादानो थाना क्षेत्रका ४७ वर्षीय फिरोज अहमद, जितपुर निवासी ३५ वर्षीय विपिन कुमार र नेपालको बारा जिल्ला, सिम्रौनगढ नगरपालिका क्षेत्रअन्तर्गत चिकनी (पकडिया) निवासी २६ वर्षीय दिलीप कुमार सहनी रहेका छन्।
संयुक्त टोलीले उनीहरूको साथबाट अफिमजस्तो पदार्थसहित तीन थान एन्ड्रोइड मोबाइल र एउटा ई–रिक्सा पनि बरामद गरेको छ।
प्रारम्भिक सूचनाअनुसार उक्त पदार्थ नेपालतर्फको चिकनी क्षेत्रबाट भारतको मशाही (खैरवा) तर्फ तस्करी गरी लैजाँदै गरिएको थियो।
बरामद गरिएको पदार्थ, मोबाइल, ई–रिक्सा तथा पक्राउ परेका तीनै जनालाई थप कानुनी कारबाहीका लागि स्थानीय छौडादानो प्रहरी थानामा बुझाउने प्रक्रिया अघि बढाइएको एसएसबी स्रोतले जनाएको छ। बरामद पदार्थको प्रकृति तथा घटनाबारे थप अनुसन्धान भइरहेको छ।
