भारतको उत्तराखण्डस्थित देव संस्कृति विश्वविद्यालयका उपाध्यक्ष डा. चिन्मय पण्ड्या बहरीनको प्रतिष्ठित किंग हमद अवार्ड फर को–एग्जिस्टेन्स एन्ड टोलरेन्सको निर्णायक समितिमा सदस्यका रूपमा चयन भएका छन् ।
बहरीनका राजा हमद बिन ईसा अल खलिफाको तर्फबाट डा. पण्ड्यालाई उक्त जिम्मेवारीका लागि आमन्त्रण गरिएको हो । विभिन्न देशका प्रतिष्ठित बुद्धिजीवी, शिक्षाविद् तथा विभिन्न संस्कृति र समुदायका प्रमुख विचारकहरूलाई समेटिएको निर्णायक समितिमा डा. पण्ड्या एकमात्र भारतीय रहेको जनाइएको छ ।
सह–अस्तित्व, पारस्परिक सम्मान, सहिष्णुता तथा मानव बन्धुत्वको भावना प्रवर्द्धन गर्ने विश्वव्यापी प्रयासलाई प्रोत्साहन गर्ने उद्देश्यले यो पुरस्कार प्रदान गरिँदै आएको छ । निर्णायक समितिमा डा. पण्ड्याको सहभागितालाई अखिल विश्व गायत्री परिवारले लामो समयदेखि अघि बढाउँदै आएको मानव एकता, सामाजिक समरसता, सद्भाव तथा विश्वकल्याणको अभियानसँग पनि जोडेर हेरिएको छ ।
जिम्मेवारी स्वीकार गर्दै डा. पण्ड्याले यो मानवतालाई जोड्ने मूल्यमान्यतामा योगदान गर्ने अवसर भएको बताएका छन् । उनले उक्त जिम्मेवारी ‘वसुधैव कुटुम्बकम्’, शान्ति, सद्भाव र विश्वकल्याणका शाश्वत मूल्यसँग जोडिएको उल्लेख गरे ।
उनका अनुसार अहिले विश्वलाई आर्थिक तथा भौतिक विकाससँगै विश्वास, संवाद र मानवीय संवेदनालाई बलियो बनाउने आवश्यकता छ । विभिन्न धर्म, संस्कृति र विचारबीच सम्मानपूर्ण संवाद नै दीगो शान्तिको आधार बन्न सक्ने उनको भनाइ छ ।
