रौतहट, २० भदौ। मधेस प्रदेशका पूर्व अर्थमन्त्री तथा संविधानसभा सदस्य सुनिल कुमार यादव (जितेन्द्र) को पहलमा रौतहटमा निर्माण सम्पन्न भएका पाँचवटा विकास योजनाको एकैपटक उद्घाटन गरिएको छ।
स्थानीय कटहरिया नगरपालिका–१ भसेढवामा निर्माण सम्पन्न भएका ती योजनाको शुक्रबार विशेष समारोहबीच उद्घाटन गरिएको हो।
पूर्व प्रदेश सांसद कुन्दन कुशवाहाको सक्रियता तथा तत्कालीन अर्थमन्त्री यादवको पहलमा प्रदेश सरकारबाट बजेट व्यवस्थापन गरी योजनाहरू निर्माण गरिएको बताइएको छ।
आर्थिक वर्ष २०८२/०८३ मा सम्पन्न भएका योजनाअन्तर्गत १६ लाख रुपैयाँको खुला व्यायामशाला, १२ लाख रुपैयाँको नागरिक आरोग्य भवन, १२ लाख रुपैयाँको योग भवन, १६ लाख रुपैयाँको दलित भवन र १२ लाख रुपैयाँको स्वास्थ्य चौकी भवन स्तरोन्नति रहेका छन्।
वडा नम्बर १ का अध्यक्ष भूपेन्द्र महतो कोइरी र वडा नम्बर ४ का अध्यक्ष चन्दन कुशवाहाले संयुक्त रूपमा ती संरचनाको उद्घाटन गरेका हुन्।
उद्घाटन कार्यक्रममा वडा अध्यक्ष भूपेन्द्र महतो कोइरीले निर्माण भएका संरचनाको संरक्षण र प्रभावकारी सदुपयोगमा स्थानीयवासीको भूमिका महत्वपूर्ण हुने बताएका छन्। उनले सार्वजनिक लगानीबाट बनेका संरचनालाई समुदायको आवश्यकता र हितअनुसार प्रयोग गर्नुपर्नेमा जोड दिएका छन्।
कार्यक्रमका प्रमुख अतिथि वडा ४ का चन्दन कुशवाहाले विकास योजना ल्याउन पूर्व प्रदेश सांसद कुन्दन कुशवाहाको पहल तथा तत्कालीन अर्थमन्त्री सुनिल कुमार यादव (जितेन्द्र) को सक्रिय भूमिकाको प्रशंसा गरेका छन्। उनले विशेषगरी खुला व्यायामशाला र योग भवनलाई स्थानीय नागरिकले नियमित रूपमा प्रयोग गर्न आग्रह गरेका छन्।
एकै स्थानमा स्वास्थ्य, योग, व्यायाम तथा सामाजिक प्रयोजनका लागि आवश्यक पूर्वाधार निर्माण हुनु स्थानीय बासिन्दाका लागि उपयोगी मानिएको छ। विशेषगरी स्वास्थ्य चौकीको स्तरोन्नतिसँगै नागरिक आरोग्य, योग र व्यायामसम्बन्धी संरचना निर्माण हुँदा भौतिक पूर्वाधारसँगै स्वास्थ्य र सामाजिक विकासलाई समेत जोड्ने प्रयास देखिन्छ। यद्यपि यस्ता संरचनाको वास्तविक प्रभाव भने नियमित सञ्चालन, संरक्षण र स्थानीयको सहभागितामा निर्भर रहनेछ।
कार्यक्रममा जनप्रतिनिधि, समाजसेवी, बुद्धिजीवी, सञ्चारकर्मी, सुरक्षाकर्मी तथा स्थानीयवासीको उल्लेख्य सहभागिता रहेको थियो।
