वीरगञ्ज । पर्सा जिल्लाको यातायात व्यवस्था कार्यालय, वीरगञ्ज अन्तर्गतको ट्रायल सेन्टरमा अख्तियार दुरुपयोग अनुसन्धान आयोगको टोलीले लगातार दोस्रो दिन पनि निगरानी गरेको छ । हेटौडा कार्यालयबाट खटिएको टोलीले वीरगञ्ज महानगरपालिका वडा नम्बर २३, प्रसौनी विर्तास्थित ट्रायल सेन्टरमा अनुगमन तथा निरीक्षणलाई निरन्तरता दिएको हो। तीन महिनादेखि अवरुद्ध रहेको ट्रायल प्रक्रियालाई शनिवारदेखि पुनः सुरु गरिएको थियो।
कार्तिक ४ गते सवारी चालक अनुमतिपत्रका लागि सूचना प्रकाशित भएसँगै ९ गते शुक्रवार लिखित परीक्षा सम्पन्न भएको थियो भने शनिवार र आइतवार क्रमशः मोटरसाइकल, स्कुटर तथा कार, जीप, डेलिभरी भ्यान, टेम्पो, अटो रिक्सा र ई–रिक्साको प्रयोगात्मक परीक्षा (ट्रायल) सञ्चालन गरियो।
अख्तियारको टोलीको सक्रियता
अख्तियारका प्रहरी निरीक्षक बिमल गिरीको नेतृत्वमा गएको टोलीले ट्रायल प्रक्रिया पारदर्शी र निष्पक्ष बनाउनका लागि प्रत्यक्ष रुपमा सबै गतिविधिहरूमा निगरानी गरिरहेको छ । यस क्रममा कुनै पनि अनियमितता वा त्रुटि हुन नदिन टोलीले गहन रूपमा परीक्षा प्रक्रियामा सहभागीहरूलाई निरन्तर अवलोकन गरेको जनाइएको छ ।
अख्तियार दुरुपयोग अनुसन्धान आयोग हेटौडाका प्रमुख उमाकान्त आचार्यले सेवाग्राहीबाट प्राप्त उजुरी र गुनासोको आधारमा निगरानी गरिएको बताएका छन् । आचार्यका अनुसार सेवाग्राहीहरूले समस्या र कठिनाइ भोग्नु परेको वा अनियमितता भएको जनगुनासो आउँदा निगरानी गर्नु अख्तियारको जिम्मेवारी हो। यस प्रकारको अनुगमनले सेवाग्राहीका गुनासोहरू सम्बोधन गर्न र सेवाको गुणस्तर सुधार गर्न ठोस कदम चाल्न मद्दत गर्ने आचार्यले बताएका छन्।
