प्रतिनिधि सभामा महिला उम्मेदवार न्यून : एमालेबाट ११, माओवादीबाट ६ र कांग्रेसबाट ५ जना मात्रै

काठमाण्डाै – मंसिर ४ गते हुने प्रतिनिधि सभा र प्रदेश सभा चुनावमा दलहरुले निकै कम सङ्ख्यामा मात्रै महिला उम्मेदवार बनाएका छन् ।

निर्वाचन आयोगले प्रत्यक्षतर्फ ३३ प्रतिशत महिला उम्मेदवार बनाउन निदेशन दिए पनि दलहरुले त्यसको बेवास्ता गरेका छन् । नेकपा एमालेबाट प्रतिनिधि सभामा ११ जना महिलाले उम्मेदवारी दिएका छन् । नेकपा माओवादी केन्द्रले ६ जना र नेपाली कांग्रेसले ५ जना महिलालाई मात्र टिकट दिएको छ।

कांग्रेसले तेह्रथुममा सीता गुरुङ र मोरङ क्षेत्र नम्बर–२ बाट सुजाता कोइरालालाई उम्मेदवार बनाएको छ । कांग्रेसबाट सिरहा क्षेत्र नम्बर–२ मा पूर्व उपसभामुख चित्रलेखा यादवको उम्मेदवारी परेको छ । कांग्रेसबाट मकवानपुर क्षेत्र नम्बर–१ मा नेपाली कांग्रेसकी सहमहामन्त्री महालक्ष्मी उपाध्याय ‘डिना’ले र अर्घाखाँचीबाट पुष्पा भुसालले उम्मेदवारी दर्ता गराउनुभएको छ ।

एमालेले भगवती चौधरीलाई सुनसरी निर्वाचन क्षेत्र नम्बर–३ बाट र मञ्जु चौधरीलाई उदयपुर–१ बाट टिकट दिएको छ । एमालेबाट बारा–३ बाट ज्वाला शाह र धनुषा – ३ बाट जुली कुमारी महतोले उम्मेदवारी दिनुभएको छ । यस्तै एमालेले स्याङ्जा–२ बाट पद्मा अर्याल, कास्की–२ बाट विद्या भट्टराई, बाग्लुङ–२ बाट मञ्जु शर्मा चालिसे, दाङ –१ बाट शान्ता चौधरी र दाङ–३ बाट कोमल वलीलाई अवसर दिएको छ । एमालेबाटै डोटीमा गौरी ओलीले र कञ्चनपुर–३ मा निरु पालले उम्मेदवारी दिनुभएको छ ।

माओवादी केन्द्रबाट ललितपुर– ३ मा पम्फा भुसाल, काठमाण्डौ–९ मा कल्पना धमला, दाङ– ३ मा रेखा शर्मा, काठमाण्डाै–२ मा ओनसरी घर्ती, जुम्लामा गोमा गौतम, कञ्चनपुर–३ मा विना मगर र काठमाण्डौ–७ मा मानुषी यमी भट्टराई उम्मेदवार बन्नुभएको छ ।

त्यस्तै नेकपा एकीकृत समाजवादीबाट गुल्मी–२ मा रामकुमारी झाँक्रीले उम्मेदवारी दिनुभएको छ । राष्ट्रिय प्रजातन्त्र पार्टी नेपालबाट मोरङ–३ मा रेखा थापाले उम्मेदवारी दिनुभएको छ ।