हैदाराबाद, ३१ असोज। दक्षिण भारतीय सुपरस्टार रजनीकान्तको एक्सन ड्रामा चलचित्र 'जेलर २' ले बक्स अफिसमा शानदार कीर्तिमान कायम गर्दै उत्कृष्ट सुरुवात गरेको छ।
नेल्सन दिलीपकुमारद्वारा निर्देशित यो चलचित्र अक्टोबर १५ मा प्रदर्शनमा आएको थियो र यसले भारतमा आफ्नो पहिलो दिनमै ५९ करोड ७० लाख रुपैयाँ खुद कमाइ (नेट कलेक्सन) गरेको छ।
व्यापारसम्बन्धी वेबसाइट 'सकनिल्क' (Sacnilk) का अनुसार यस चलचित्रले देशभरका १६ हजार ५९९ शोहरूबाट ७० करोड २५ लाख रुपैयाँ कुल घरेलु कमाइ (ग्रस कलेक्सन) गरेको छ भने विदेशबाट ५५ करोड रुपैयाँ आर्जन गरेको छ। यसरी, प्रदर्शनको पहिलो दिनमै चलचित्रको विश्वव्यापी कमाइ १ अर्ब २५ करोड २५ लाख रुपैयाँ पुगेको छ।
'जेलर २' ले यसै वर्षको जनवरीमा रिलिज भएको 'धुरन्धर २' को विदेशमा भएको कमाइको रेकर्ड तोडेको छ। 'धुरन्धर २' ले आफ्नो प्रदर्शनको पहिलो दिन विदेशमा ५२ करोड रुपैयाँ कमाएको थियो भने 'जेलर २' ले ५५ करोड रुपैयाँ कमाएको छ।
विश्वभर कुल १ अर्ब २५ करोड २५ लाख रुपैयाँ कमाउँदै यसले रणवीर कपूरको चलचित्र 'एनिमल' (जसले विश्वभर ११६ करोड रुपैयाँको ओपनिङ गरेको थियो) को रेकर्डलाई समेत उछिनेको छ। यो चलचित्र हेर्न पहिलो दिन करिब ३७ लाख ४६ हजार ७३४ दर्शक हलमा पुगेका थिए।
चार भाषामा प्रदर्शन भएको यस चलचित्रको कमाइमा तमिल संस्करण अग्रस्थानमा रह्यो। तमिल संस्करणमा यसले ९,३२६ शोहरूबाट ४३ करोड ३५ लाख रुपैयाँ खुद कमाइ संकलन गर्यो, जसमा औसत अकुपेन्सी (दर्शक उपस्थिति) ७०.८ प्रतिशत थियो भने तेलुगु संस्करणमा २ हजार ७९२ शोहरूबाट १२ करोड ५० लाख रुपैयाँ संकलन गर्यो। हिन्दी संस्करणमा ४,३७१ शोहरूबाट ३ करोड ५० लाख रुपैयाँ खुद कमाइ गर्दा कन्नड संस्करणमा यसले ११० शोहरूबाट ३५ लाख रुपैयाँ संकलन गरेकाे छ । यी चारै भाषालाई जोड्दा भारतमा चलचित्रको कुल खुद कमाइ ५९ करोड ७० लाख रुपैयाँ पुगेको छ।
नेल्सन दिलीपकुमारद्वारा निर्देशित 'जेलर २' मा रजनीकान्त पुनः सेवानिवृत्त जेलर 'टाइगर मुथुवेल पाण्डियन' को भूमिकामा देखिएका छन्। अन्डरवर्ल्ड (अपराधी जगत) बाट नयाँ चुनौती आइपरेपछि आफ्नो परिवार र विरासतको रक्षा गर्न उनी पुनः पुरानो हिंस्रक बाटोमा फर्कन बाध्य हुन्छन्। यस एक्सन थ्रिलरमा रजनीकान्तका साथै मोहनलाल र विद्या बालन पनि मुख्य भूमिकामा रहेका छन्।
