जनकपुरधाम, २० भदौ । रसुवाको भोटेकोशी सहित विभिन्न नदी क्षेत्रमा आएको विनाशकारी बाढीमा परी मधेश प्रदेशका सम्पर्कविहिन हुनेहरुको संख्या २२० पुगेको छ । सम्पर्कविहिन मध्ये ३९ जना सम्पर्कमा आएका छन भने ३ जनाको शव फेला परेको छ ।
मधेश प्रदेश प्रहरी कार्यालयले उपलब्ध गराएको तथ्यांक अनुसार शुक्रवार बिहानसम्म प्रदेशका ८ वटै जिल्लाका गरी २२० जना सम्पर्कविहिन रहेको छ भने ती मध्ये ३८ जना सम्पर्कमा आएको हो । सम्पर्कविहिन मध्ये मधेश प्रदेशका बारा र सप्तरी जिल्लाका एक÷एक जना गरी दुईजनाको शव फेला परेको हो ।
प्रहरीको तथ्यांक बाहेक आज सप्तरीका एक जना सम्पर्कमा आएका छन् भने महोत्तरीको गौशाला नगरपालिका ५ का शव फेला परेको थियो । सम्पर्कमा आएका सप्तरीका संजय साह र शव फेला परेको महोत्तरी गौशाला १ का कुशल खप्ताङ्गी मगरको विवरण प्रहरी तथ्यांकमा समावेश छैन ।
प्रदेश प्रहरी कार्यालयका प्रवक्ता प्रभुप्रसाद ढकालले भने हामीलाई जानकारी आएसम्मको विवरण राखेका छौं । शव फेला परेको मध्ये महोत्तरी गौशालका मगर बारे जानकारी आएको छैन र आजबिहान करीब साढे १० बजेतिर सम्पर्कमा आएको मध्ये साह बारे ढिलो भएर जानकारी भएका कारण विवरणमा समावेश गरिएको छैन ।
प्रहरी विवरण अनुसार सबैभन्दा बढी सप्तरीका ५२ जना सम्पर्कविहीन छन् । जसमध्ये तीन जना सम्पर्कमा आएका छन् भने एक जनाको मृत्यु भएको छ । त्यसपछि पर्साका ४६ जना सम्पर्कविहीन रहेकोमा तीन जना सम्पर्कमा आएका छन् ।
बाराका ३० जनामध्ये चार जना सम्पर्कमा आएका छन् भने एक जनाको मृत्यु भएको छ । रौतहटका २० जनामध्ये छ जना, सर्लाहीका २७ जनामध्ये छ जना, महोत्तरीका १७ जनामध्ये सात जना र धनुषाका १४ जनामध्ये सात जना सम्पर्कमा आएका छन् । सिरहाका १४ जनामध्ये दुई जना सम्पर्कमा आएका छन् ।
विवरण अनुसार सम्पर्कविहीन हुनेमा प्रहरी कर्मचारी र नेपाली सेना समेत रहेका छन् । १० जना प्रहरी कर्मचारी सम्पर्कविहीन रहेकोमा आठ जना सम्पर्कमा आएका छन् । त्यस्तै नेपाली सेनातर्फ पाँच जना सम्पर्कविहीन रहेकोमा एक जना सम्पर्कमा आएका छन् ।
प्रहरी विवरण अनुसार हालसम्म मधेशका आठ जिल्लाबाट २२० जना सम्पर्कविहीन, ३८ जना सम्पर्कमा र दुई जनाको मृत्यु भएको हो । रसुवाको बाढीमा ठूलो संख्यामा मानिस सम्पर्कविहीन भएपछि खोज तथा उद्धार कार्यलाई तीव्रता दिइएको छ । नेपाल प्रहरीले पनि बाढी प्रभावित क्षेत्रमा खोज, उद्धार तथा समन्वयको काम जारी राखेको जनाएको छ ।
