काठमाडाैं |
ताइवानका परराष्ट्रमन्त्री जोसेफ वुले चीनसँग सन् २०२७ मा युद्धका लागि तयारी गरिरहेको बताएका छन् ।
एलबीसीको टुनाइट विथ एन्ड्रु मारसँग कुरा गर्दै वुले भने, ‘चीनको सैन्य जोखिमलाई हामीले निकै गम्भीरतापूर्वक लिएका छौं । सन् २०२७ का लागि हामी गम्भीर हुनुपर्छ ।’
चीनका राष्ट्रपति सी चिनपिङले देशको सेनालाई सन् २०२७ सम्ममा ताइवान मिसाइसक्न आदेश दिएको अमेरिकी गुप्तचर निकायले विश्वास गरेको छ । चीनले ताइवानलाई आफ्नै एक प्रान्त मान्ने गरेको छ र मुख्यभूमिसँग त्यो मिसिनुपर्छ भन्ने गरेको छ ।
शुक्रवार मात्र चीनका परराष्ट्रमन्त्री छिन काङले ताइवान जलसन्धिका दुवै भाग चीनकै भएको बताएका छन् । ताइवानको विषयमा आगोसँग खेल्नेहरू आफैं डढ्नेछन् समेत उनले बताए ।
केही अमेरिकी अधिकारीहरू चाहिँ त्यसअगावै युद्ध हुने विश्वास गर्छन् । गत जनवरी महिनामा अमेरिकाको हिन्द–प्रशान्त कमान्डका उपकमान्डर जनरल माइक मिनिहानले सन् २०२५ मा युद्ध हुन सक्ने आभास आफूलाई मिलेको बताएका थिए ।
