काठमाडौं, ११ कात्तिक। इजरायलमा अहिलेसम्म कुनै पनि दलले स्पष्ट बहुमत प्राप्त गर्न सकेका छैनन्, जसको अर्थ यहाँ सधैं गठबन्धन सरकार बन्ने गरेको छ।
सरकार गठनको यो प्रक्रिया मतगणना सकिएपछि सुरु हुन्छ। इजरायलका राष्ट्रपतिले विभिन्न दलका नेताहरूसँग परामर्श गर्छन् र जसले सरकार गठन गर्न सक्ने सबैभन्दा बढी सम्भावना देख्छन्, त्यही नेतालाई सरकार गठनका लागि आमन्त्रण गर्छन्।
त्यसपछि ती नेतासँग गठबन्धन बनाउन २८ दिनको समय हुन्छ। यदि थप समय आवश्यक परेमा उनीहरूले १४ दिनको म्याद थपका लागि अनुरोध गर्न सक्छन्। यदि यो अवधिभित्र वार्ता सफल भएन भने राष्ट्रपतिले अर्को कुनै नेतालाई गठबन्धन बनाउने प्रयास गर्नका लागि छनोट गर्न सक्छन्।
यदि त्यो प्रयास पनि असफल भएमा 'नेसेट' (इजरायली संसद्) का सदस्यहरूले राष्ट्रपतिलाई तेस्रो नेतालाई मौका दिन आग्रह गर्न सक्छन्। यदि त्यो प्रयाससमेत असफल भएमा नयाँ निर्वाचनको घोषणा गरिन्छ।
सन् २०१९ देखि २०२२ को बीचमा इजरायलमा पाँच पटक निर्वाचन भयो किनकि राजनीतिक दलहरू पटक-पटक एक-अर्कासँग सहकार्य गर्न असफल भइरहेका थिए।
सन् २०२२ को निर्वाचनपछि बेन्जामिन नेतान्याहुको 'लिकुड' पार्टी १२० सिटमध्ये ३२ सिट जितेर सबैभन्दा ठूलो दल बन्यो। पछि उनले केही अति-दक्षिणपन्थी दलहरूसँग गठबन्धन गरे, जसले उनलाई र उनका सहयोगीहरूलाई ६४ सिटसहितको बहुमत दिलायो।
