समुदाय र विद्यालयमा पुगेर कानुनबारे सचेतना फैलाउँदै पूर्वाञ्चल विश्वविद्यालयका कानून विद्यार्थी

बारा । कानुनबारे आधारभूत ज्ञानको अभावमा नागरिकले आफ्नै अधिकार र कर्तव्यबारे अनभिज्ञ बन्नुपर्ने अवस्था अन्त्य गर्ने उद्देश्यले बाराको प्रसौनी गाउँपालिकामा कानुनी सचेतना अभियान सञ्चालन गरिएको छ। “कानुनी ज्ञान, सचेत समाजको पहिचान” तथा “कानुन जानौँ, सचेत रहौँ” भन्ने मूल नाराका साथ सञ्चालित अभियानअन्तर्गत स्थानीय समुदाय तथा विद्यालयमा पुगेर नागरिक र विद्यार्थीलाई दैनिक जीवनसँग जोडिएका कानुनी विषयबारे जानकारी दिइँदैछ।

पूर्वाञ्चल विश्वविद्यालय, कानुन संकाय, डिनको कार्यालय तथा कानून, न्याय तथा संसदीय मामिला मन्त्रालयको नेतृत्वमा सञ्चालित संस्थागत सुधारमार्फत न्यायमा पहुँच अभिवृद्धि परियोजना (A2J-II) सँगको सम्झौताअनुसार Clinical/Community Legal Education 2026 कार्यक्रमअन्तर्गत अभियान सञ्चालन गरिएको हो।

अभियानमा पूर्वाञ्चल विश्वविद्यालयका B.A.LLB चौथो वर्षका विद्यार्थीहरू ममता यादव, एस. एम. कल्पना, चित्र छाया सहनी र जुली मण्डल सहभागी छन्। विद्यार्थीहरूले प्रसौनी गाउँपालिकाका वडा नं. १ देखि ७ सम्म पुगेर स्थानीय बासिन्दासँग सामाजिक तथा कानुनी समस्यासम्बन्धी जानकारी संकलन गरी त्यसका आधारमा सचेतनामूलक कार्यक्रम सञ्चालन गरिरहेका छन्।

विद्यार्थी टोलीले प्रारम्भिक चरणमा स्थानीयस्तरमा देखिएका सामाजिक तथा कानुनी समस्या पहिचान गर्न Data Collection गरेको थियो। समुदायको वास्तविक आवश्यकता र समस्यालाई आधार बनाएर प्रभावकारी कानुनी सचेतना प्रदान गर्ने उद्देश्यले तथ्य संकलन गरिएको विद्यार्थीहरूको भनाइ छ।

यसैक्रममा बुधबार प्रसौनी गाउँपालिका–२ स्थित बेङ्गा साह माध्यमिक विद्यालयमा कानुनी सचेतना कार्यक्रम सञ्चालन गरिएको थियो। कार्यक्रममा विद्यार्थीलाई मौलिक अधिकार तथा कर्तव्य, बाल अधिकार, महिला तथा बालबालिकाविरुद्ध हुने हिंसा, साइबर अपराध र लागूऔषधसम्बन्धी कानुनी व्यवस्थालगायतका विषयमा जानकारी दिइएको थियो।

कार्यक्रममा कानुन अदालतमा हुने विवाद समाधानका लागि मात्र नभई प्रत्येक नागरिकको दैनिक जीवनसँग प्रत्यक्ष जोडिएको विषय भएकाले सबैले आधारभूत कानुनी ज्ञान हासिल गर्नुपर्नेमा जोड दिइएको थियो।

स्थानीय समुदाय तथा विद्यालय तहमा कानुनी ज्ञानको पहुँच विस्तार गर्दै नागरिकलाई आफ्ना अधिकार, कर्तव्य र कानुनी उपचारका उपायबारे सचेत बनाउने अभियानको मुख्य उद्देश्य रहेको जनाइएको छ। Clinical/Community Legal Education 2026 अन्तर्गत प्रसौनी गाउँपालिकाका विभिन्न वडा तथा विद्यालयमा आगामी दिनमा समेत यस्ता कार्यक्रमलाई निरन्तरता दिइने बताइएको छ।