काठमाडौं। नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले संविधानको रक्षा र राष्ट्रिय एकता सुदृढ गर्न संविधानका पक्षधर शक्तिहरू एक ठाउँमा उभिनुपर्नेमा जोड दिएका छन्।
संविधान दिवसका अवसरमा स्वदेश तथा विदेशमा रहेका सम्पूर्ण नेपालीहरूमा शुभकामना व्यक्त गर्दै अध्यक्ष ओलीले मुलुकलाई सही दिशा दिन र जोगाउन परिवर्तनका पक्षधरहरूबीच सहकार्य आवश्यक रहेको बताएका हुन्।
विगतका लोकतान्त्रिक, वामपन्थी, देशभक्तिपूर्ण तथा विभिन्न सामाजिक आन्दोलनका क्रममा शहादत प्राप्त गर्ने शहीदहरूप्रति श्रद्धाञ्जली अर्पण गर्दै उनले संविधान जारी भएलगत्तै देशले भोगेको नाकाबन्दीजस्तो कठिन परिस्थितिको स्मरण गरे। उक्त चुनौतीले नै संविधानको रक्षा र राष्ट्रिय एकताको महत्त्वलाई थप उजागर गरेको उनको भनाइ थियो।
साथै, संविधान निर्माणको जटिल मोडमा आफ्नो पार्टी नेतृत्वको सरकारले छोटो समयमै आवश्यक कानुन निर्माण र संरचनात्मक आधार तयार गरी संविधानलाई व्यावहारिक कार्यान्वयनको चरणमा पुर्याएको दाबीसमेत ओलीले गरेका छन्।
