वीरगञ्ज । वीरगञ्ज महानगरपालिका वडा नं. २६ मा करिब १ करोड रुपैयाँको लागतमा निर्माण सम्पन्न भएको अत्याधुनिक वडा कार्यालय तथा स्वास्थ्य चौकी भवनको एक विशेष समारोहबीच उद्घाटन गरिएको छ। भवनको उद्घाटन वीरगञ्ज महानगरपालिकाका कार्यवाहक नगर प्रमुख इम्तियाज आलमले प्रमुख अतिथिका रूपमा गर्नुभयो।
उद्घाटनसँगै वडा नं. २६ का स्थानीयवासीले आफ्नै वडाबाट प्रशासनिक तथा आधारभूत स्वास्थ्य सेवा थप व्यवस्थित, छिटो र प्रभावकारी रूपमा प्राप्त गर्ने अपेक्षा गरिएको छ। नयाँ भवन सञ्चालनमा आएपछि सेवा प्रवाहको गुणस्तर सुधार हुने र सेवाग्राहीले सहज वातावरणमा सेवा लिन सक्ने विश्वास व्यक्त गरिएको छ।
समारोहलाई सम्बोधन गर्दै कार्यवाहक नगर प्रमुख इम्तियाज आलमले वडा नं. २६ को समग्र विकासमा आफू सदैव प्रतिबद्ध रहने बताउनुभयो। उहाँले स्थानीय आवश्यकता र जनअपेक्षाअनुसार पूर्वाधार विकासलाई निरन्तर प्राथमिकतामा राखिने उल्लेख गर्दै आगामी दिनमा पनि वडाको विकासका लागि आवश्यक सहयोग गर्न कुनै कसर बाँकी नराख्ने प्रतिबद्धता व्यक्त गर्नुभयो।
कार्यक्रममा वडा नं. २६ का वडा अध्यक्ष शम्भु मिश्राले भवन निर्माणमा कार्यवाहक नगर प्रमुख आलमको विशेष भूमिका रहेको बताउनुभयो। उहाँले करिब १ करोड रुपैयाँको बजेटमा निर्माण सम्पन्न भएको वडा कार्यालय र स्वास्थ्य चौकी भवन उहाँकै सक्रिय पहल र सहयोगका कारण सम्भव भएको उल्लेख गर्दै त्यसका लागि सार्वजनिक रूपमा धन्यवाद व्यक्त गर्नुभयो।
वीरगञ्ज महानगरपालिकाका प्रमुख प्रशासकीय अधिकृत वसन्त बहादुर बोहराले स्थानीय तहको प्रभावकारी सेवा प्रवाहका लागि आफ्नै कार्यालय भवन अत्यन्त आवश्यक रहेको बताउनुभयो। उहाँले महानगरका सबै ३२ वटै वडामा सुविधासम्पन्न कार्यालय भवन निर्माण गर्ने लक्ष्यलाई क्रमिक रूपमा पूरा गरिने विश्वास व्यक्त गर्नुभयो।
उद्घाटन समारोहमा विभिन्न वडाका वडा अध्यक्ष, जनप्रतिनिधि, नागरिक समाजका अगुवा, कर्मचारी, वडा सदस्य तथा स्थानीय बासिन्दाको उल्लेखनीय उपस्थिति रहेको थियो। सहभागीहरूले नयाँ भवनले प्रशासनिक सेवा र प्राथमिक स्वास्थ्य सेवा थप व्यवस्थित र नागरिकमैत्री बन्ने विश्वास व्यक्त गरेका थिए।
स्थानीयवासीका अनुसार आफ्नै वडा कार्यालय र स्वास्थ्य चौकी भवन सञ्चालनमा आएपछि विभिन्न प्रशासनिक कामका लागि अन्यत्र धाउनुपर्ने बाध्यता हट्नेछ भने स्वास्थ्य सेवा पनि अझ सहज रूपमा उपलब्ध हुनेछ। यसले स्थानीय सरकारप्रति नागरिकको विश्वास थप मजबुत बनाउनुका साथै वडाको समग्र विकासमा सकारात्मक योगदान पुग्ने अपेक्षा गरिएको छ।
