जीसीडी नेपाली प्रिमियर लिग क्रिकेट यूएई सेप्टेम्बर ५ बाट सुरु, रमेश श्रेष्ठको पहलमा पहिलो संस्करण सुरु हुँदै

दुबई,नेपाली क्रिकेटको विकास, प्रवर्द्धन र प्रवासी नेपाली खेलाडीलाई प्रतिस्पर्धात्मक अवसर प्रदान गर्ने उद्देश्यसहित संयुक्त अरब इमिरेट्स (यूएई) मा जीसीडी नेपाली प्रिमियर लिग क्रिकेटको पहिलो संस्करण आयोजना हुने भएको छ। जीसीडी ग्रुप अफ कम्पनीजका अध्यक्ष एबम एनआरएनए मध्यपुर्व संयोजक रमेश श्रेष्ठको पहलमा आयोजना हुन लागेको प्रतियोगिता आगामी सेप्टेम्बर ५ बाट सुरु हुँदैछ ।
दुबईस्थित हिल्टन होटलमा आयोजित पत्रकार सम्मेलनमा आयोजकले प्रतियोगिताको तयारी अन्तिम चरणमा पुगेको जानकारी दिएको हो। यूएईमा पहिलोपटक आयोजना हुन लागेको प्रतियोगितालाई नेपाली खेलाडीको प्रतिभा पहिचान गर्ने, नयाँ खेलाडीलाई अवसर दिने र नेपाली समुदायलाई खेलकुदमार्फत जोड्ने अभियानका रूपमा अघि बढाइएको छ।

जीसीडी ग्रुप अफ कम्पनीजका अध्यक्ष रमेश श्रेष्ठले प्रतियोगिता पूर्वनिर्धारित कार्यक्रम भएकाले नेपालमा पछिल्लो समय आएको बाढी तथा पहिरोका कारण उत्पन्न विषम परिस्थितिका बीच पनि निर्धारित समयमै आयोजना गर्न लागिएको बताए । विपद्का कारण देशमा ठूलो क्षति भइरहेका बेला आफूहरू पनि प्रभावित नेपालीको पीडाप्रति संवेदनशील रहेको उल्लेख गर्दै श्रेष्ठले खेलकुदसँगै सामाजिक उत्तरदायित्वलाई प्राथमिकता दिइएको बताए।

श्रेष्ठ आफैं नेपाल पुगेर बाढी तथा पहिरो प्रभावित क्षेत्रमा स्थलगत रूपमा पुगेका थिए। उनले प्रभावित क्षेत्रमा राहत सामग्री वितरण गर्नुका साथै पीडित परिवारसँग भेटेर अवस्थाबारे जानकारी लिएका थिए। राहत तथा उद्धारका लागि गैरआवासीय नेपाली संघ (एनआरएनए) लगायत विभिन्न माध्यमबाट हालसम्म ५ लाख ११ हजार रुपैयाँभन्दा बढी सहयोग गरिसकेका छन ।
त्यसैगरी, जीसीडी नेपाली प्रिमियर लिगको तर्फबाट बाढी तथा पहिरो प्रभावित नागरिकको राहत तथा उद्धारका लागि १ लाख ११ हजार १ सय ११ रुपैयाँ प्रधानमन्त्री राहत कोषमा जम्मा गरिएको आयोजकले जनाएको छ। प्रतियोगितालाई खेलकुदमा मात्र सीमित नराखी सामाजिक उत्तरदायित्वसँग जोड्ने उद्देश्यले उक्त सहयोग गरिएको आयोजकको भनाइ छ।

श्रेष्ठले जीसीडी नेपाली प्रिमियर लिग यूएईमा पहिलोपटक आयोजना हुन लागेको उल्लेख गर्दै प्रतियोगिताले यूएईमा रहेका नेपाली क्रिकेट खेलाडीलाई आफ्नो क्षमता प्रदर्शन गर्ने महत्वपूर्ण अवसर प्रदान गर्ने बताए। उनका अनुसार नियमित प्रतिस्पर्धाको वातावरण निर्माणसँगै नयाँ प्रतिभालाई पहिचान गरी नेपाली क्रिकेटको विकासमा योगदान पुर्‍याउने लक्ष्य प्रतियोगिताको हो।

पत्रकार सम्मेलनका प्रमुख अतिथि नेपाल कन्सुलेट जनरल, दुबईका कन्सुलर कुञ्जन शाहले विदेशमा रहेका नेपाली खेलाडीका लागि यस्ता प्रतियोगिता महत्वपूर्ण हुने बताए। नेपाली खेलाडीको प्रतिभा विकास र प्रवर्द्धनका लागि प्रतियोगिताले सकारात्मक भूमिका खेल्ने उल्लेख गर्दै शाहले खेलकुदका माध्यमबाट प्रवासी नेपाली समुदायबीच आपसी सम्बन्ध र एकता अझ बलियो हुने बताए।

कार्यक्रममा गैरआवासीय नेपाली संघ (एनआरएनए) आईसीसीका सचिव भुवानीप्रसाद तिमल्सिना,एनआरएनए मध्यपुर्व सह संयोजक बिकाश शाही, एनआरएनए यूएईका अध्यक्ष भीम मल्ल ठकुरीलगायत यूएईमा क्रियाशील विभिन्न नेपाली संघसंस्था, व्यवसायी, सामाजिक अभियन्ता तथा सञ्चारकर्मीहरूको उल्लेख्य उपस्थिति थियो।

उपस्थित संघसंस्था तथा प्रतिनिधिहरूले यूएईमा नेपाली क्रिकेटलाई व्यवस्थित र प्रतिस्पर्धात्मक रूपमा अघि बढाउने उद्देश्यसहित प्रतियोगिता आयोजना गरेकोमा जीसीडी ग्रुप तथा रमेश श्रेष्ठको पहलको प्रशंसा गरे। उनीहरूले नेपाली खेलाडीलाई आफ्नो प्रतिभा प्रदर्शन गर्ने अवसर सिर्जना गर्ने प्रतियोगितालाई आगामी दिनमा समेत निरन्तरता दिनुपर्ने बताए।

प्रतियोगिताको पहिलो संस्करण सेप्टेम्बर ५ देखि २६ तारिखसम्म प्रत्येक शनिबार शारजाहको अल बताहस्थित फरहान क्रिकेट मैदानमा सञ्चालन हुनेछ। प्रतियोगितामा नेपालिज क्रिकेट क्लब, जीसीडी गोर्खाली राइनोज क्रिकेट क्लब, एभरेस्ट वारियर्स अबुधाबी क्रिकेट क्लब र नेपाल टाइटन्स क्रिकेट क्लब गरी चार टोलीबीच प्रतिस्पर्धा हुनेछ।

प्रतियोगिताका लिग चरणका खेल प्रत्येक शनिबार राति ९ बजे र ११ः५९ बजे सञ्चालन हुनेछन्। सेप्टेम्बर २६ मा फाइनल खेलसँगै विशेष समापन समारोह आयोजना गरिनेछ।

प्रतियोगिताको अर्को महत्वपूर्ण पक्ष नेपाली खेलाडीलाई दिइएको प्राथमिकता हो। प्रत्येक खेलमा मैदानमा उत्रिने ११ सदस्यीय टोलीमा कम्तीमा नौ जना नेपाली खेलाडी अनिवार्य हुनेछन्। बढीमा तीन जना विदेशी खेलाडीले मात्र खेल्न पाउने व्यवस्था गरिएको छ। प्रत्येक टोलीमा १७ जना खेलाडी रहनेछन्।

प्रतियोगिताको विजेताले ५ हजार यूएई दिराम नगदसहित ट्रफी र पदक प्राप्त गर्नेछ भने उपविजेताले २ हजार यूएई दिरामसहित पदक प्राप्त गर्नेछ। उत्कृष्ट ब्याट्सम्यान, उत्कृष्ट बलर, उत्कृष्ट फिल्डर तथा प्रतियोगिताका उत्कृष्ट खेलाडीलाई व्यक्तिगत पुरस्कार प्रदान गरिने आयोजकले जनाएको छ।

नेपाली दर्शक तथा समुदायको सहभागिता सहज बनाउन आयोजकले बुर्ज दुबई, अल क्वोज र सोनापुरबाट फरहान क्रिकेट मैदानसम्म निःशुल्क बस सेवा सञ्चालन गर्ने जनाएको छ।

प्रतियोगिताको मुख्य प्रायोजक जीसीडी ग्रुप अफ कम्पनीज रहेको छ भने अल फरदान एक्सचेन्ज प्लाटिनियम स्पोन्सरका रूपमा जोडिएको छ। पत्रकार सम्मेलनमा अल फरदान एक्सचेन्जका तर्फबाट पाँच जना प्रतिनिधिको सहभागिता रहेको थियो। साथै, यूएईमा रहेका विभिन्न नेपाली व्यवसायिक प्रतिष्ठान तथा संघसंस्थाले प्रतियोगितालाई सहयोग गरेका छन्।

यूएईमा नेपाली समुदायको उपस्थिति र गतिविधि विस्तार भइरहेका बेला नेपाली क्रिकेटलाई प्रवासमा थप व्यवस्थित र प्रतिस्पर्धात्मक बनाउने प्रयासका रूपमा जीसीडी नेपाली प्रिमियर लिगलाई हेरिएको छ। विशेषगरी यूएईमा रहेका नेपाली खेलाडीले आफ्नो क्षमता प्रदर्शन गर्ने नियमित मञ्च पाउने र नयाँ प्रतिभालाई अगाडि बढ्ने अवसर सिर्जना हुने अपेक्षा गरिएको छ।

पहिलोपटक आयोजना हुन लागेको जीसीडी नेपाली प्रिमियर लिगलाई आयोजकले क्रिकेट प्रतियोगिताभन्दा माथि उठाएर नेपाली प्रतिभा पहिचान, खेलाडी विकास, सामुदायिक एकता र सामाजिक उत्तरदायित्वको साझा अभियानका रूपमा अघि सारेको छ। पहिलो संस्करणलाई सफल बनाएर आगामी दिनमा प्रतियोगितालाई थप व्यवस्थित, व्यापक र नियमित बनाउने लक्ष्यसहित जीसीडी नेपाली प्रिमियर लिगको पहिलो संस्करण सेप्टेम्बर ५ बाट सुरु हुँदैछ।