काठमाडाैं, १६ भदाैं । सेप्टेम्बर १ को मिति विश्व इतिहासमा अनेकौँ दूरगामी र महत्त्वपूर्ण घटनाहरूसँग जोडिएको छ। यस दिन विश्वमा घटेका प्रमुख ऐतिहासिक घटनाहरू यस्ता रहेका छन ।
१. दोस्रो विश्वयुद्धको सुरुवात (१९३९)
सन् १९३९ सेप्टेम्बर १ मा एडोल्फ हिटलरको नेतृत्वमा जर्मन सेनाले पोल्यान्डमाथि आक्रमण गर्यो। यसै घटनासँगै मानव इतिहासकै सबैभन्दा भयावह ‘दोस्रो विश्वयुद्ध’ सुरु भएको थियो।
२.‘द सन’ पत्रिकाको स्थापना (१८३३)
सन् १८३३ सेप्टेम्बर १ मा न्युयोर्क सहरबाट ‘द सन’ नामक समाचारपत्रको प्रकाशन सुरु भयो। यसले आम सर्वसाधारणलाई लक्षित गरी सस्तो मूल्यमा समाचार पुर्याउने ‘पेनी प्रेस’ युगको सुरुवात गरेको मानिन्छ।
३. पहिलो राष्ट्रिय निकुञ्ज ‘येलोस्टोन’ को स्थापना (१८७०)
सन् १८७० मा वासबर्न ल्याङफोर्ड डोएन अभियान टोलीले अमेरिकाको ‘येलोस्टोन’ क्षेत्रको अवलोकन सम्पन्न गर्यो। यसै अभियानको प्रतिवेदनका आधारमा पछि विश्वकै पहिलो राष्ट्रिय निकुञ्ज ‘येलोस्टोन नेसनल पार्क’ स्थापना भएको थियो।
४. टाइटानिक जहाजको अवशेष फेला परेको (१९८५)
सन् १९८५ सेप्टेम्बर १ मा डा. रोबर्ट बलार्ड र उनको संयुक्त अमेरिकी फ्रान्सेली टोलीले एटलान्टिक महासागरको गहिराइमा सन् १९१२ मा डुबेको प्रसिद्ध ‘टाइटानिक’ जहाजको भग्नावशेष फेला पारेका थिए।
५. लिबियामा मुअम्मर गद्दाफीद्वारा सत्ता कब्जा (१९६९)
सन् १९६९ सेप्टेम्बर १ मा लिबियामा मुअम्मर अल गद्दाफीको नेतृत्वमा भएको रक्तपातहीन ‘सैन्य कु’ ले त्यहाँको राजा इड्रिस प्रथमको शासन अन्त्य गरी गद्दाफीको साढे चार दशक लामो शासनको जग बसालेको थियो।
६. रुसी अन्तरिक्ष यान (भेनरा ११’ को प्रक्षेपण (१९७८)
सन् १९७८ सेप्टेम्बर १ मा सोभियत सङ्घले शुक्र ग्रहको अध्ययनका लागि ‘भेनरा ११’ नामक अन्तरिक्ष यान सफलतापूर्वक प्रक्षेपण गरेको थियो।
