पाकिस्तानमा आधारित आतंकवादी नेताप्रति चीनको दोहोरो चरित्र

51

ब्राजिल, रुस, भारत, चीन र दक्षिण अफ्रिका सम्मिलित पाँच राष्ट्र समूह ब्रिक्सका परराष्ट्रमन्त्रीहरूको दक्षिण अफ्रिकामा हालै सम्पन्न बैठकपछि जारी घोषणापत्रमा आतंकवादको कडा निन्दा गरिएको छ । घोषणापत्रमा हस्ताक्षरकर्ताहरूले आतंकवादविरुद्ध लड्ने प्रतिबद्धतालाई दोहोर्‍याएका छन् ।

पाकिस्तानमा आधारित आतंकवादीहरुबाट लामो समयदेखि सीमापार आक्रमणको सामना गरिरहेको भारतका लागि यो घोषणापत्रलाई कूटनीतिक विजयीका रुपमा हेरिएको छ ।

संयुक्त घोषणापत्रमा कुनै देशको नाम नलिइएपनि भारतले विगतमा पाकिस्तानलाई ‘आतंकवादको केन्द्र’ भनेर वर्णन गर्दै आएको छ । भारतले पाकिस्तानले हाफिज सईद, मसूद अजहर, साजिद मीर र दाउद इब्राहिमजस्ता आतंकवादीहरूलाई आश्रय दिएको बताउने गरेको छ ।

तर, विश्लेषकहरु पाकिस्तानमा आधारित आतंकवादविरुद्ध लड्ने विषयमा चीनको विरोधाभाष रहँदै आएको बताउने गरेका छन् ।

सन् २०२२ को अक्टोबर महिनामा अमेरिका र भारतले संयुक्त राष्ट्रसंघमा लस्कर ए तैएबाका नेता शाहिद महमुदलाई विश्वव्यापी आतंकवादी घोषणा गर्ने प्रस्ताव ल्याएका थिए । तर त्यस प्रस्तावलाई चीनले रोकिदिएको थियो ।

त्यस्तै, २०२२ कै जुन महिनामा पनि पाकिस्तनमै आधारित अर्का आतंककारी नेता अब्दुल रहमान मक्कीलाई पनि विश्वव्यापी आतंकवादीका रुपमा सूचीकृत गर्ने प्रस्तावलाई पनि चीनले अस्वीकार गरेको थियो ।

यद्यपि सन् २०२३ मा मक्कीलाई विश्वव्यापी आतंकवादी नेताको रुपमा सूचीकृत गर्ने प्रस्तावलाई राष्ट्रसंघले स्वीकृत गरेको थियो । त्यसैगरी, सन् २०२२ को अगस्ट महिनामा जैश ए मोहम्मदका वरिष्ठ नेता अब्दुल रउफ अजहरलाई विश्वव्यापी आतंकवादी सूचीकृत गर्ने प्रस्ताव स्वीकृत गराउन चीन बाध्य भएको थियो ।

यद्यपि मुम्बईमा भएको आक्रमणमा संलग्न भएको आरोप लागेका साजिद मीरलाई विश्वव्यापी आतंकवादीका रुपमा सूचीकृत गर्ने विषयमा सन् २०२२ को सेप्टेम्बरमा राष्ट्रसंघमा ल्याइएको प्रस्तावलाई पनि चीनले अस्वीकृत गरिदिएको थियो ।

पाकिस्तानमा आधारित आतंककारी समूह र यी समूहका नेतालाई ‘विश्वव्यापी आतंकवादी’ का रुपमा सूचीकृत गर्ने संयुक्त राष्ट्रसंघको प्रस्तावलाई चीनले अस्वीकार गर्दै आएको छ ।

आतंकवादका विषयमा यस्ता कदमलाई विश्लेषकहरु चीनको दोहोरो चरित्रका रुपमा अथ्र्याउने गरेका छन् ।

Leave A Reply

Your email address will not be published.