नेपाल दूतावास र PNCC को संयुक्त पहलमा पाँच वर्षदेखि बेपत्ता दिपेन्द्र शर्माको उद्धार।
मलेसिया :=नेपाल दूतावास मलेसिया र प्रवासी नेपाली समन्वय समिति (PNCC) को संयुक्त पहलमा पाँच वर्षदेखि बेपत्ता रहेका दिपेन्द्र शर्मा उद्धार भएर स्वदेश फर्किएका छन्। केही दिनअघि उनी पेनाङस्थित एक चाइनिज मन्दिरमा वेवारिसे रूपमा बसोबास गरिरहेको अवस्थाबाट भेटिएका थिए।
सप्तरी जिल्लाको राजगढ–५, मलेकपुरका दिपेन्द्र कुमार शर्मा नौ वर्षअघि रोजगारीका सिलसिलामा मलेसिया आएका थिए। रोजगारदाता कम्पनीले प्रतिवद्ध सेवा–सुविधा नदिएपछि उनले कम्पनी छोडे र त्यसपछि undocumented भएर काम गर्दै आएका थिए। यसै क्रममा उनी पाँच वर्षदेखि परिवारसँग पूर्ण रूपमा सम्पर्कविहीन बनेका थिए।
मलेशियामै कार्यरत उनका छिमेकी दाजु शोवित दासले दिपेन्द्रको खोजीका लागि नेपाल दूतावास तथा PNCC मा औपचारिक अनुरोध गरेपछि दूतावास र समिति दुवैले संयुक्त रूपमा खोजी प्रक्रिया सुरु गरेका थिए। खोजतलासकै क्रममा दिपेन्द्र पेनाङको चाइनिज मन्दिरमा बेवारिसे अवस्थामा फेला परे।
दूतावासको समन्वयमा PNCC का Outreach Officer सुरेश देबकोटाले 2025 नोभेम्बर 17 का दिन मन्दिरबाट दिपेन्द्रलाई उद्धार गरी दूतावास ल्याएका थिए। मानसिक तथा शारीरिक अवस्था कमजोर देखिएकाले उनलाई केही दिन दूतावास र PNCC को निगरानीमा सुरक्षित स्थानमा राखेर उपचार तथा हेरचाहको व्यवस्था गरिएको थियो। दूतावासले तत्काल निःशुल्क एकतर्फी यात्रा कागजात (Travel Document) पनि प्रदान गरेको थियो।
दिपेन्द्रलाई स्वदेश फर्काउने सम्पूर्ण प्रक्रिया नेपाल दूतावास, PNCC तथा बाग्लुङ सेवा समाज मलेसियाको सहकार्यमा अघि बढाइएको थियो। आवश्यक कागजात दूतावासले तयार गर्यो भने फर्कने खर्च दिपेन्द्रका परिवारले बेहोरेका थिए।
उनीलाई PNCC मलेसियाका संयोजक पूर्ण लिम्बु, बाग्लुङ सेवा समाजका अध्यक्ष कृष्ण खड्का तथा NRNA मलेसियाकी महिला संयोजक इन्दु बस्नेतले KLIA विमानस्थलमा बिदाइ गरेका थिए। स्वदेश फर्कँदै गर्दा दिपेन्द्रले नेपाल दूतावास, PNCC र सबै सहयोगी संस्थाप्रति आभार व्यक्त गर्दै भने, “अब नेपालमै बसेर फर्निचरको काम गर्नेछु, विदेश नजाने निर्णय गरेको छु।