पेनाङ मलेसियामा नेपाल तामाङ समाजद्वारा भव्य प्रथम सोनाम ल्होछार सांस्कृतिक कार्यक्रम हुने।

पेनाङ, मलेसिया — समस्त तामाङ तथा बौद्ध मार्गीहरूले मनाउने महत्वपूर्ण धार्मिक–सांस्कृतिक पर्व महा मञ्जुश्री सम्बत २८६२, ता ल्हो (घोडा वर्ग) राष्ट्रिय सोनाम ल्होछारको अवसरमा नेपाल तामाङ समाज पेनाङ मलेसियाले भव्य सांस्कृतिक कार्यक्रम आयोजना गर्ने भएको छ।

समाजका अनुसार, तामाङ समुदायको भाषा, धर्म, संस्कृति, कला, संस्कार र पहिचानको संरक्षण तथा प्रवर्द्धन गर्दै यसलाई विश्वव्यापी स्तरमा परिचित गराउने उद्देश्यले कार्यक्रम आयोजना गरिएको हो। साथै, नेपाल र विदेशमा रहेका नेपाली समुदायबीच शान्ति, सद्भाव र भातृत्व बढाउँदै एकताको सन्देश फैलाउन पनि कार्यक्रम महत्वपूर्ण हुने आयोजकले जनाएको छ।

यस अवसरमा स्थानीय कलाकारहरूसँगै नेपालबाट आमन्त्रित
लोकप्रिय सेलो गायिका जितु लोप्चन,
चर्चित गायक सञ्जीब घिसिङ
द्वारा विशेष सांगीतिक प्रस्तुति रहने जनाएको छ। उनीहरूको प्रस्तुति कार्यक्रमको मुख्य आकर्षण रहने अपेक्षा गरिएको छ।

नेपाल तामाङ समाज पेनाङ मलेसियाले यस प्रथम सोनाम ल्होछार सांस्कृतिक कार्यक्रमलाई सफल र ऐतिहासिक बनाउन पेनाङ तथा आसपास क्षेत्रका सबै नेपाली दाजुभाइ–दिदीबहिनीहरूलाई विशिष्ट अतिथिको रूपमा उपस्थितिका लागि हार्दिक निमन्त्रणा गरेको छ।