पेनाङ, मलेसिया – नेपाल मगर संघ, पेनाङ क्षेत्रीय समितिको नियमित मासिक बैठक १४ सेप्टेम्बर २०२५ मा अध्यक्ष बिरस पुन मगरको अध्यक्षतामा सम्पन्न भएको छ। बैठकमा संघलाई थप सबल र संगठित बनाउन विभिन्न विषयमा छलफल गरिएको थियो। 
बैठकमा संघमा नयाँ सदस्यका रूपमा तिपेन्द्र बुढा मगर, रोसन ढेङ्गा मगर, बल ब. कानुङ मगर, गम ब. बराल मगर, विशाल रासकोती मगर, रेसम सुर्यबङ्शी मगर, भक्त ब. सोमै मगर, नारायण सिङ थकाली मगर, भबिलाल सोमै मगर र दिपेन्द्र बुढा मगरलाई स्वागत गर्दै संघको गतिविधिमा सक्रिय सहभागिताको अपेक्षा व्यक्त गरिएको छ। 
बैठकले विदेशमा रहेका मगर समुदायबीच एकता, सहयोग र समर्पण सुदृढ गर्ने उपाय, आगामी १९ अक्टोबरमा हुने अधिवेशनको तयारी, साथै मौलिक भाषा, संस्कृति र सभ्यता संरक्षण तथा प्रवर्द्धनका लागि रणनीति तय गरेको छ। 
नेतृत्वद्वारा प्रस्तुत प्रतिवेदनमा संघले पेनाङ क्षेत्रमा मगर समुदायलाई संगठित गर्ने, युवालाई सांस्कृतिक कार्यक्रममार्फत सक्रिय बनाउने, आपसी सहयोग र सहकार्यलाई बलियो बनाउने योजनाहरू अघि सारिएको उल्लेख गरिएको थियो। 
नेपाल मगर संघ, पेनाङ क्षेत्रीय समितिले निरन्तर मगर एकता, पहिचान र मौलिकताको संरक्षणका लागि सक्रिय रहने प्रतिवद्धता व्यक्त गर्दै सबैलाई संगठनमा आवद्ध भई साथ दिन आह्वान गरेको छ।