मलेसिया । १४ र १५ सेप्टेम्बरमा भव्यतापूर्वक सम्पन्न भएको खुल्ला भलिबल प्रतियोगितामा गोर्खाली भलिबल टिमले शानदार प्रदर्शन गर्दै उपाधि चुमेको छ।
प्रतियोगितामा आयोजक ओखलढुंगा युवा क्लब उपविजेता बनेको छ भने तेस्रो स्थान कुलुवाङ भलिबल टिमले हात पारेको छ।
विजेता गोर्खाली भलिबल टिमलाई उपाधिसहित नगद RM ३,५००, ट्रफी, मेडल तथा प्रमाणपत्र प्रदान गरिएको थियो। दोस्रो हुने ओखलढुंगा युवा क्लबले नगद RM २,५००, ट्रफी, मेडल र प्रमाणपत्र प्राप्त गरेको छ भने तेस्रो हुने कुलुवाङ भलिबल टिमले नगद RM १,५००, ट्रफी, मेडल र प्रमाणपत्र प्राप्त गरेका छन्।
विधागत पुरस्कार प्राप्तकर्ताहरू
प्रतियोगितामा उत्कृष्ट खेल प्रदर्शन गर्ने खेलाडीलाई विभिन्न विधागत पुरस्कारहरू समेत प्रदान गरिएको थियो।
• Best Setter: गोपाल थापा मगर (ओखलढुंगा युवा क्लब A)
• Best Libero: लक्ष्मण थापा मगर (ओखलढुंगा युवा क्लब A)
• Best Spiker: राजेन्द्र बम (कुलुवाङ भलिबल टिम)
• Best Blocker: रवि थापा मगर (गोर्खाली भलिबल टिम)
• Best Player: आलाप श्रेष्ठ (गोर्खाली भलिबल टिम)
खेलमैत्री भावना र उत्साह
दुई दिनसम्म चलेको यो प्रतियोगिताले खेलाडीबीच आपसी सहयोग, अनुशासन, मैत्री भावना र प्रतिभा प्रदर्शन गर्ने अवसर प्रदान गरेको आयोजक ओखलढुंगा युवा क्लबले जनाएको छ। साथै, मलेसियामा बसोबास गर्ने नेपाली समुदायबीच एकता र सद्भाव बढाउन खेलकुदले महत्वपूर्ण भूमिका खेल्ने विश्वास व्यक्त गरिएको छ।
प्रतियोगिता सफल बनाउन सहयोग गर्ने सम्पूर्ण खेलप्रेमी, प्रायोजक, अतिथि र उपस्थित दर्शकहरूलाई आयोजकले धन्यवाद ज्ञापन गरेको छ।