जेरी अन टप’ अब मलेसियामा पनि प्रदर्शन हुने, डिसेम्बर पहिलो सातादेखि बक्स अफिस रिलिज

काठमाडौं । नेपालमा विशाल व्यापारिक सफलता हासिल गरिसकेको सुपरहिट फिल्म ‘जेरी अन टप’ अब मलेसियामा पनि प्रदर्शन हुने भएको छ। घरेलु बक्स अफिसमा १२ करोड रुपैयाँभन्दा बढी कमाइ गर्दै थप चर्चा कमाएको यस फिल्मप्रति विदेशमा समेत उत्सुकता बढेको छ।

गैरआवासीय नेपाली संघ (एनआरएनए) एशिया–प्यासिफिक संयोजक हरि भट्टराईले मलेसियाका लागि प्रदर्शन अधिकार किनेका छन्। उनका अनुसार डिसेम्बरको पहिलो सातादेखि मलेसियाका मुख्य सहरका हलहरूमा बक्स अफिस शो सुरु हुनेछ।

भट्टराईका अनुसार मलेसियामा कार्यरत करिब पाँच लाख नेपालीलाई लक्षित गरी शोको तालिका मिलाइनेछ। उनले अधिकांश नेपाली श्रमिकको तलब आउने समय नजिकिन लागेकाले रिलिज केही ढिलो भएको बताए।
“मलेसियामा दिनभर मेहनत गर्ने नेपाली श्रमिकका लागि यो फिल्म उत्कृष्ट मनोरञ्जन र तनाव घटाउने माध्यम बन्नेछ,” भट्टराईले भने।

नेपाल, अष्ट्रेलिया र अमेरिकामा एकसाथ रिलिज भएको ‘जेरी अन टप’ हाल यूरोप तथा मध्यपूर्वका विभिन्न सहरमा प्रदर्शन भइरहेको छ। साथै, यूके, दक्षिण कोरिया र थाइल्यान्डमा पनि रिलिज प्रक्रिया अघि बढिरहेको निर्माता पक्षले जनाएको छ।

अनमोल केसीको करियरमै सर्वाधिक कमाइ गरेको मानिएको यो फिल्म अन्तर्राष्ट्रिय बजारमा पनि उत्तिकै रुचाइिरहेको छ। निर्देशक सुयोग गुरुङले निर्देशित तथा अनन्या फिल्म्सको ब्यानरमा बनेको फिल्ममा आँचल शर्मा, जसिता गुरुङ, भुवन केसी, केदार घिमिरे (माग्ने बुढा), उषा खड्गी, सुरक्षा पन्तलगायत कलाकारहरूको दमदार अभिनय रहेको छ।